എറണാകുളം: ഹൈക്കോടതി ജസ്റ്റിസ് ദേവൻ രാമചന്ദ്രനെതിരെ സൈബർ ആക്രമണം നടത്തിയയാളുടെ ഫേസ്ബുക്ക് അക്കൗണ്ട് അക്കൗണ്ട് മരവിപ്പിച്ച് പോലീസ്. പി കെ സുരേഷ് കുമാർ എന്നയാളുടെ അക്കൗണ്ട് ആണ് പോലീസ് മരവിപ്പിച്ചത്.
ദേവൻ രാമചന്ദ്രനെതിരെ നടന്ന സൈബർ ആക്രമണത്തിന് നടപടിയാവശ്യപ്പെട്ട് ഹൈക്കോടതി അഭിഭാഷകനും പൊതുപ്രവ‌ർത്തകനുമായ കുളത്തൂർ ജയ്‌സിംഗ് ആണ് സംസ്ഥാന പോലീസ് മേധാവിക്കും കൊച്ചി സൈബർ ക്രൈം പൊലീസ് സ്റ്റേഷനിലും പരാതി നല്‍കിയത്. ഇതിന്റെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്തിരുന്നു. അപകീർത്തിപ്പെടുത്തൽ, കലാപത്തിനുള്ള ശ്രമം തുടങ്ങിയ വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്.
കേസില്‍ അന്വേഷണം തുടരുന്നതിനിടെയാണ് സുരേഷ് കുമാറിന്റെ അക്കൗണ്ട് മരവിപ്പിച്ചു കൊണ്ടുള്ള നടപടി.
പൊതുസ്ഥലത്തെ അനധികൃത ഫ്ളക്സ് ബോർഡുകളും കൊടിതോരണങ്ങളും നീക്കം ചെയ്യണമെന്ന് ഹൈക്കോടതി നിര്‍ദേശിച്ചിരുന്നു. ഇത് പാലിക്കാത്ത ഉദ്യോഗസ്ഥർക്കെതിരെ പിഴ ചുമത്തുന്നത് ഉൾപ്പെടെ
കടുത്ത നടപടിയുണ്ടാകുമെന്ന് ജസ്റ്റിസ് ദേവൻ രാമചന്ദ്രൻ ഉത്തരവിട്ടിരുന്നു. ഇതിന് പിന്നാലെയാണ് സൈബർ ആക്രമണം ആരംഭിച്ചത്.
ഹൈക്കോടതിയുടെ ഉത്തരവ് നടപ്പാക്കാന്‍ അധികൃതർ നടപടി സ്വീകരിച്ചതോടെ സാമൂഹിക മാദ്ധ്യമങ്ങളിലൂടെ അധിക്ഷേപ പരാമർശങ്ങൾ നടത്തുകയായിരുന്നു. ഇതിനെതിരെയാണ് അഭിഭാഷകനായ ജയ്‌സിംഗ് പരാതി നൽകിയത്. സൈബർ ക്രൈം അസി. കമ്മിഷണർ എംകെ മുരളിയുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.
Discussion about this post