ദില്ലി: തുടര്‍ച്ചയായി ഉപയോഗമില്ലാതെയിരുന്നാല്‍ സിം കാര്‍ഡിന്റെ വാലിഡിറ്റി അവസാനിക്കുമോ എന്ന മൊബൈല്‍ ഉപഭോക്താക്കളുടെ ആശങ്കയ്ക്ക് പരിഹാരം. രണ്ട് സിം കാര്‍ഡുകള്‍ ഒരു ഫോണില്‍ ഉപയോഗിക്കുന്നവര്‍ ചിലപ്പോള്‍ സെക്കന്‍ഡറി സിം ഉപയോഗിക്കാറേയുണ്ടാവില്ല. ദീര്‍ഘകാലം ഉപയോഗിക്കാതിരിക്കുന്ന പ്രീപെയ്ഡ് സിം കാര്‍ഡുകള്‍ പ്രവര്‍ത്തനരഹിതമാക്കുന്നത് സംബന്ധിച്ച മാനദണ്ഡങ്ങളില്‍ ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) മാറ്റങ്ങള്‍ വരുത്തിയതാണ് ആശ്വാസ വാര്‍ത്ത.
സിം കാര്‍ഡില്‍ കുറഞ്ഞത് 20 രൂപ ബാലന്‍സുണ്ടെങ്കില്‍ ഇനി മുതല്‍ സിം ആക്റ്റീവായി നിലനിര്‍ത്താം. നേരത്തെ എല്ലാ മാസവും ഏകദേശം 199 രൂപയ്ക്ക് റീച്ചാര്‍ജ് ചെയ്താല്‍ മാത്രമായിരുന്നു സിം കാര്‍ഡ് ആക്റ്റീവായി നിലനിര്‍ത്താന്‍ കഴിഞ്ഞിരുന്നത്.
പുതിയ നിയമത്തിന്റെ പ്രത്യേകതകള്‍ ഇങ്ങനെ
90 ദിവസക്കാലം കോളിനോ മെസേജിനോ ഡാറ്റയ്‌ക്കോ മറ്റ് സര്‍വീസുകള്‍ക്കോ സിം കാര്‍ഡ് ഉപയോഗിച്ചില്ലെങ്കില്‍ സിം ഡീആക്റ്റിവേറ്റാകും.എന്നാല്‍ 90 ദിവസം കഴിയുമ്പോള്‍ നിങ്ങളുടെ അക്കൗണ്ടില്‍ 20 രൂപയെങ്കിലുമുണ്ടെങ്കില്‍ അത് ഓട്ടോമാറ്റിക്കായി ഡിഡക്റ്റ് ചെയ്യപ്പെടും സിം കാലാവധി 30 ദിവസം നീട്ടിലഭിക്കുകയും ചെയ്യും.
ബാലന്‍സ് 20 രൂപയോ അതിലധികമോ ഉള്ള എത്ര കാലത്തേക്ക് വേണമെങ്കിലും സിം കാലാവധി നീട്ടിലഭിക്കും. അതേസമയം ബാലന്‍സ് 20 രൂപയില്‍ താഴെയായാല്‍ സിം കാര്‍ഡ് ഡീയാക്റ്റിവേറ്റ് ചെയ്യപ്പെടും. എന്നാല്‍ സിം പ്രവര്‍ത്തനരഹിതമായി 15 ദിവസത്തിനുള്ളില്‍ 20 രൂപയ്ക്ക് റീച്ചാര്‍ജ് ചെയ്താല്‍ നിങ്ങള്‍ക്ക് സിം കാര്‍ഡിനെ പുനരുജീവിപ്പിക്കാനാകും.
