തൃശൂര്: കൈക്കൂലി വാങ്ങിയ വില്ലേജ് ഓഫീസര് പിടിയിലായി. അതിരപ്പിള്ളി വില്ലേജ് ഓഫീസറായ കെഎല് ജൂഡിനെയാണ് വിജിലന്സ് സംഘം കൈക്കൂലിമായി പിടികൂടിയത്. ഇദ്ദേഹം കൈക്കൂലിയായി വാങ്ങിയ 3000 രൂപ വലതു കാലിലെ സോക്സിനുള്ളില് ഒളിപ്പിച്ച് വെക്കുകയായിരുന്നു. സോക്സിനുള്ളില് നിന്നാണ് വിജിലന്സ് സംഘം പണം പിടിച്ചെടുത്തത്. റെക്കോഡ് ഓഫ് റൈറ്റ്സ് സര്ട്ടിഫിക്കറ്റ് (ആര്ഒആര്) നല്കുന്നതിനാണ് കൈക്കൂലി ആവശ്യപ്പെട്ടത്.
ഇതിന് പിന്നാലെ സര്ട്ടിഫിക്കറ്റിന് അപേക്ഷ നല്കിയ വ്യക്തി വിജിലന്സിനെ വിവരം അറിയിക്കുകയായിരുന്നു. ഇന്നലെയാണ് വിജിലന്സിന് അപേക്ഷ നല്കിയ വ്യക്തി പരാതി നല്കിയത്. തുടര്ന്ന് വിജിലന്സ് അന്വേഷണം നടത്തിയപ്പോള് പരാതിയില് വസ്തുതയുണ്ടെന്ന് വ്യക്തമായി.
വിജിലന്സ് നല്കിയ ഫിനോഫ്തലിന് പുരട്ടിയ നോട്ടുകളാണ് കൈക്കൂലിയായി കൈമാറിയത്. ഇതിനിടെ വിജിലന്സ് സംഘമെത്തി കയ്യോടെ പിടികൂടുകയായിരുന്നു. സ്ഥല പരിശോധന നടക്കുമ്പോഴും വിജിലന്സ് സംഘം പിന്തുടര്ന്നിരുന്നു. കൈക്കൂലി കേസില് ആദ്യമായിട്ടല്ല കെഎല് ജൂഡ് അറസ്റ്റിലാകുന്നത്. 2022ല് കാസര്കോട് ജോലി ചെയ്യുന്നതിനിടെ കൈക്കൂലി വാങ്ങിയ കേസിലെ രണ്ടാം പ്രതിയാണ് ജൂഡ്.
Discussion about this post