ലക്‌നൗ: ലോകത്തിലെ തന്നെ ഏറ്റവും വലിയ ആഘോഷങ്ങളിൽ ഒന്നായ കുംഭമേള കഴിയാൻ ഇനി ദിവസങ്ങൾ മാത്രമാണ് ഉള്ളത്. ജനുവരിയിൽ ആരംഭിച്ച മഹോത്സവം ശിവരാത്രി കഴിയുന്നതോട് കൂടി പര്യവസാനിയ്ക്കും. അവസാന നാളുകളിൽ കുംഭമേളയിൽ പങ്കെടുക്കാൻ നിരവധി പ്രമുഖരാണ് എത്തുന്നത്. രാഷ്ട്രീയക്കാർ മുതൽ സിനിമാ താരങ്ങൾ വരെ ഇതിലുണ്ട്. ഇപ്പോഴിതാ കുംഭമേളയുടെ ഭാഗം ആയിരിക്കുകയാണ് പൃഥ്വിരാജിന്റെ ഭാര്യ സുപ്രിയ മേനോനും.
ഇന്നലെയാണ് സുപ്രിയ കുംഭമേളയിൽ പങ്കെടുക്കാൻ പ്രയാഗ്‌രാജിൽ എത്തിയത്. ഗംഗാ നദിയിലൂടെ തോണിയിൽ സഞ്ചരിക്കുന്നതിന്റെ ദൃശ്യങ്ങൾ സുപ്രിയ സമൂഹമാദ്ധ്യമങ്ങളിൽ പങ്കുവച്ചിരുന്നു. കാവി നിറവും കറുപ്പും കലർന്ന വസ്ത്രം ആയിരുന്നു ഇവർ ധരിച്ചിരുന്നത്. ഒറ്റയ്ക്കാണ് സുപ്രിയ ഇവിടെ എത്തിയത് എന്നാണ് വിവരം. സെൽഫി വീഡിയോ മാത്രമാണ് സുപ്രിയ പങ്കുവച്ചിട്ടുള്ളത്.
നടി സംയുക്ത മേനോൻ ആണ് ഈ വർഷം കുംഭമേളയിൽ പങ്കെടുക്കാൻ ആദ്യം പ്രയാഗ്‌രാജിൽ എത്തിയത്. ത്രിവേണി സംഗമത്തിൽ സ്‌നാനം ചെയ്യുന്നതിന്റെ ചിത്രങ്ങൾ താരം ഇതിന് പിന്നാലെ പങ്കുവച്ചിരുന്നു. ഇതിന് വലിയ ആരാധക പ്രീതിയാണ് ലഭിച്ചത്. എന്നാൽ ചിലരിൽ നിന്നും വിമർശനവും ലഭിച്ചു.
ഇതിന് പിന്നാലെ കൃഷ്ണകുമാർ, ജയസൂര്യ, സുരേഷ് കുമാർ എന്നിവരും കുംഭമേളയിൽ പങ്കെടുക്കാൻ എത്തിയിരുന്നു. കുടുംബ സമേതം ആയിരുന്നു ജയസൂര്യ പ്രയാഗ്‌രാജിൽ എത്തിയത്. ഹിന്ദി നടൻ നിതീഷ് ഭരദ്വാജിനെ ജയസൂര്യ ഇവിടെവച്ച് കണ്ടിരുന്നു. ഇരുവരും ഒന്നിച്ചുള്ള ചിത്രവും ജയസൂര്യ പങ്കുവച്ചിരുന്നു.
ജനുവരി 16 ന് ആയിരുന്നു മഹാകുംഭമേള ആരംഭിച്ചത്. ഇതിന് പിന്നാലെ പ്രയാഗ്‌രാജിൽ വലിയ തിരക്ക് അനുഭവപ്പെടുകയായിരുന്നു. ഇതുവരെ 50 കോടിയിലധികം ആളുകളാണ് കുംഭമേളയിൽ പങ്കെടുത്തത്.
Discussion about this post