2025 ജൂലൈ അഞ്ചിന് എന്ത് സംഭവിക്കും എന്നുള്ള കാത്തിരിപ്പിലാണ് ഇപ്പോൾ ലോകജനത. ഈ ആശങ്കയ്ക്ക് കാരണമായിട്ടുള്ളത് ആകട്ടെ 1999 ൽ പുറത്തിറങ്ങിയ ഒരു ജാപ്പനീസ് മാംഗയും. 2025 ജൂലൈ അഞ്ചിന് ജപ്പാനെ പിടിച്ചു കുലുക്കുന്ന ഒരു വൻ ഭൂകമ്പവും പിന്നാലെ വലിയ സുനാമിയും സംഭവിക്കും എന്നാണ് ഈ മാംഗയിൽ പ്രവചിച്ചിരിക്കുന്നത്. ഇതേ മാംഗയിൽ 2011ലെ തോഹോകു ദുരന്തം കൃത്യമായി പ്രവചിച്ചിരുന്നതാണ് ഈ ആശങ്കയ്ക്ക് കാരണമായിട്ടുള്ളത്.
‘വാതാഷി ഗ മിത മിറായി’ ( ഞാൻ കണ്ട ഭാവി ) എന്ന ജാപ്പനീസ് മാംഗ ആണ് ഈ പ്രവചനങ്ങൾ നടത്തിയിട്ടുള്ളത്. 1999 – ൽ റിയോ ടാറ്റ്സുകി എഴുതി പ്രസിദ്ധീകരിച്ച വാതാഷി ഗാ മിത മിറായിയിൽ 2011 മാർച്ചിൽ ഒരു വലിയ ദുരന്തം പ്രവചിച്ചിരുന്നു. തോഹോകു ഭൂകമ്പത്തെയും ഫുകുഷിമ ആണവ പ്രതിസന്ധിയെയും കുറിച്ചുള്ള ഈ പരാമർശമാണ് പതിറ്റാണ്ടുകൾ പഴക്കമുള്ള ഈ പുസ്തകത്തെ വീണ്ടും ജനങ്ങൾക്കിടയിൽ ശ്രദ്ധകേന്ദ്രം ആക്കിയത്. റിയോ ടാറ്റ്സുകിയുടെ അടുത്ത പ്രവചന പ്രകാരം 2025 ജൂലൈ 5നാണ് ജപ്പാനിൽ മറ്റൊരു വൻ ദുരന്തം ഉണ്ടാകുമെന്ന് പ്രവചിച്ചിട്ടുള്ളത്.
2025 ജൂലൈ 5-ന് ജപ്പാനും ഫിലിപ്പീൻസും തമ്മിലുള്ള സമുദ്രനിരപ്പ് വിണ്ടുകീറുമെന്നും 2011 ലെ തിരമാലകളുടെ മൂന്നിരട്ടി ഉയരമുള്ള സുനാമിക്ക് കാരണമാകുമെന്നും ആണ് ‘വാതാഷി ഗ മിത മിറായി’ പ്രവചിച്ചിട്ടുള്ളത്. മുൻ പ്രവചനം കൃത്യം ആയിരുന്നതിനാൽ തന്നെ ഇത് കടുത്ത ആശങ്കയാണ് ഇപ്പോൾ സൃഷ്ടിക്കുന്നത്. ജപ്പാന്റെ ടൂറിസം രംഗത്തിൽ വൻ ഇടിവ് സൃഷ്ടിക്കാൻ പോലും ഈ പ്രവചനത്തിന് കഴിഞ്ഞിട്ടുണ്ട്. നേരത്തെ യാത്ര ബുക്ക് ചെയ്തിരുന്ന നിരവധി ടൂറിസ്റ്റുകൾ ആണ് ജൂലൈ 5നുള്ള യാത്ര റദ്ദാക്കിയിരിക്കുന്നത്. ‘വാതാഷി ഗ മിത മിറായി’യിലെ ഈ പ്രവചനവും യാഥാർത്ഥ്യമാകുമോ എന്നുള്ള കാത്തിരിപ്പിലാണ് ഇപ്പോൾ ലോകജനത ഒന്നാകെ.
Discussion about this post