ഓപ്പറേഷൻ സാഗർ ബന്ധു: ഇതാണ് സുഹൃത്ത്; ഡിറ്റ് വാ ദുരിതം പേറുന്ന ശ്രീലങ്കയ്ക്ക് ഇന്ത്യയുടെ കൈത്താങ്ങ്

ഡിറ്റ് വാ ചുഴലിക്കാറ്റ് ദുരിതം പേറുന്ന ശ്രീലങ്കയ്ക്ക് കൈത്താങ്ങുമായി ഇന്ത്യ.’ഓപ്പറേഷൻ സാഗർ ബന്ധു’ എന്ന പേരിലാണ് ഇന്ത്യ സഹായഹസ്തം നീട്ടിയത്.ദുരിതം അനുഭവിക്കുന്നവർക്കായുള്ള അടിയന്തര ദുരിതാശ്വാസ സാമഗ്രികളുമായി യാത്രതിരിച്ച ഇന്ത്യൻ വിമാനങ്ങൾ ശ്രീലങ്കയിലെത്തി. ഇന്ത്യൻ വ്യോമസേനയുടെ സി 130 വിമാനം ഇന്ന് (നവംബർ 29) പുലർച്ചെ 1.30 ഓടെയാണ് എത്തിയത്. അവശ്യ ഭക്ഷ്യവസ്തുക്കളും സാനിറ്ററി സാമഗ്രികളും വഹിച്ചുകൊണ്ടുള്ള വിമാനം കൊളംബോയിലെ ബന്ദാരനായകെ അന്താരാഷ്ട്ര വിമാനത്താവളത്തിലാണ് ലാൻഡ് ചെയ്തത്. ഇന്ത്യൻ ഹൈക്കമ്മിഷൻ ഉദ്യോഗസ്ഥരും ശ്രീലങ്കൻ വ്യോമസേന ഉദ്യോഗസ്ഥരും അവരെ സ്വീകരിച്ചു.

കെലാനി, അട്ടനഗലു നദികളിലെ ജലനിരപ്പ് അപകടകരമായ വിധത്തിൽ ഉയർന്നതിനെത്തുടർന്ന് പശ്ചിമ പ്രവിശ്യയിൽ ”അഭൂതപൂർവമായ ദുരന്ത സാഹചര്യം” ഉണ്ടാകുമെന്ന് ശ്രീലങ്കൻ അധികൃതർ മുന്നറിയിപ്പ് നൽകിയതിന് തൊട്ടുപിന്നാലെയാണ് ഇന്ത്യയുടെ അടിയന്തര സഹായം എത്തുന്നത്.

ഇന്ന് രാവിലെ 6 മണി വരെ 100 പേർ മരിച്ചതായി ദുരന്ത നിവാരണ കേന്ദ്രം (ഡിഎംസി) സ്ഥിരീകരിച്ചു. കുറഞ്ഞത് 34 പേരെ കാണാതായിട്ടുണ്ട്. 61,000 കുടുംബങ്ങളിൽ നിന്നുള്ള 200,000ലധികം ആളുകളെ ദുരന്തം ബാധിച്ചതായും റിപ്പോർട്ടുണ്ട്. ഡിറ്റ് വാ ചുഴലിക്കാറ്റിനെ തുടർന്ന് പ്രധാന ജലസംഭരണികളിൽ ചോർച്ചയുണ്ടായതാണ് ദുരന്തങ്ങൾക്ക് ആക്കം കൂട്ടിയത്