ഡൽഹി ചെങ്കോട്ടയ്ക്കടുത്തുണ്ടായ സ്‌ഫോടനവുമായി ബന്ധപ്പെട്ട് മൂന്ന് പേർ കൂടി അറസ്റ്റിൽ. ഉത്തരാഖണ്ഡിലെ ഹൽദവാനിയിൽ നിന്ന് ഒരു മതപണ്ഡിതനുൾപ്പെടെ മൂന്ന് പേരാണ് അറസ്റ്റിലായത്. ബിലാലി മസ്ജിദിലെ ഇമാമായ മുഹമ്മദ് ആസിഫ്,ഇയാളുടെ രണ്ട് സഹായികൾ എന്നിവരാണ് അറസ്റ്റിലായത്. സ്‌ഫോടനം നടത്തിയ ഉമർ നബിയുടെ ഫോൺ വിവരങ്ങൾ പരിശോധിച്ചതിന്റെ അടിസ്ഥാനത്തിലാണ് ഇവരെ പിടികൂടിയത്. ഉമർ നബിയുമായി ഇമാം മുഹമ്മദ് ആസിഫ് ഫോണിൽ ബന്ധപ്പെട്ടിരുന്നു.
പുലർച്ചെ 2.20 ഓടെയാണ് അന്വേഷണ സംഘം ഇമാമിന്റെ വീട്ടിൽ എത്തിയത്. അറസ്റ്റിനെ തുടർന്ന് പ്രദേശത്ത് സംഘർഷമുണ്ടായി. പിന്നാലെ ബൻഭൂൽപുരിലെ പള്ളിക്കും ഇമാമിന്റെ വസതിക്കും ചുറ്റും സുരക്ഷ സേനയെ വ്യന്യസിച്ചിരിക്കുകയാണ്.
ക്രമസമാധാനം ഉറപ്പാക്കാൻ അഞ്ചിലധികം പോലീസ് സ്റ്റേഷനുകളിൽ നിന്നുള്ള ഉദ്യോഗസ്ഥരെ വിന്യസിച്ചിട്ടുണ്ടെന്ന് നൈനിറ്റാൾ എസ്എസ്പി മഞ്ജുനാഥ് ടിസി പറഞ്ഞു. തെറ്റായ വിവരങ്ങളോ കിംവദന്തികളോ പ്രചരിക്കുന്നത് പരിശോധിക്കാൻ ഞങ്ങൾ സോഷ്യൽ മീഡിയ പ്രവർത്തനങ്ങൾ കർശനമായി നിരീക്ഷിക്കുന്നുണ്ടെന്നും അദ്ദേഹം വ്യക്തമാക്കി.
അതേസമയം വിദേശത്ത് നിന്ന് ഭീകരരെ നിയന്ത്രിച്ചത് വ്യക്തമാക്കുന്ന കൂടുതൽ തെളിവുകൾ പുറത്ത് വന്നിരിക്കുകയാണ്. ഉമർ അടക്കമുള്ളവരുമായി ഉകാസ എന്ന വിദേശത്തുള്ള ഭീകരൻ അഞ്ച് വർഷം മുൻപേ ബന്ധം സ്ഥാപിച്ചെന്ന് എൻഐഎ കണ്ടെത്തി.
Discussion about this post