റായ്പുർ : ഛത്തീസ്ഗഡിലെ ദന്തേവാഡയിൽ ഞായറാഴ്ച 37 കമ്മ്യൂണിസ്റ്റ് ഭീകരർ കീഴടങ്ങി. തലയ്ക്ക് 65 ലക്ഷം രൂപ വിലയിട്ടിരുന്ന 27 ഭീകരർ ഉൾപ്പെടെയാണ് ഇന്ന് കീഴടങ്ങിയത്. കുപ്രസിദ്ധ കമ്മ്യൂണിസ്റ്റ് ഭീകരനായ ഭീമ എന്ന ജഹാജ് കൽമുവും ഇന്ന് കീഴടങ്ങിയവരിൽ ഉൾപ്പെട്ടിട്ടുണ്ട്. 2019 ലും 2020 ലുമായി 26 സുരക്ഷാ സൈനികർ കൊല്ലപ്പെട്ട ആക്രമണങ്ങളിൽ പ്രതിയാണ് ഇയാൾ.
ജില്ലാ ഭരണകൂടത്തിന് മുമ്പാകെ ആയുധങ്ങൾ സമർപ്പിച്ചുകൊണ്ടാണ് കമ്മ്യൂണിസ്റ്റ് ഭീകരർ കീഴടങ്ങിയത്. സർക്കാരിന്റെ പുനരധിവാസ പദ്ധതിയായ ‘പൂന മാർഗം’ സംരംഭത്തിൽ വിശ്വസിച്ചുകൊണ്ട്, കമ്മ്യൂണിസ്റ്റ് ഭീകരർ അക്രമത്തിന്റെ പാത ഉപേക്ഷിച്ച് സമാധാനത്തിന്റെയും പുരോഗതിയുടെയും പാത സ്വീകരിച്ച് സമൂഹത്തിന്റെ മുഖ്യധാരയിലേക്ക് ചേരുകയാണെന്ന് ദന്തേവാഡ പോലീസ് സൂപ്രണ്ട് ഗൗരവ് റായ് അറിയിച്ചു. പുനരധിവാസ നയം പ്രകാരം, കീഴടങ്ങിയ കമ്മ്യൂണിസ്റ്റ് ഭീകരർക്ക് 50,000 രൂപയുടെ സഹായവും, നൈപുണ്യ വികസനത്തിനുള്ള പരിശീലനം, കൃഷിഭൂമി മുതലായവയും ഛത്തീസ്ഗഢ് സർക്കാർ നൽകുന്ന മറ്റ് സൗകര്യങ്ങളും നൽകുമെന്നും പോലീസ് പ്രസ്താവനയിൽ പറഞ്ഞു.
‘കമ്പനി നമ്പർ 02’ അംഗമായ ഭീമ എന്ന ജഹാജ് കൽമു 2019 ലും 2020 ലും സുരക്ഷാസേനക്കെതിരെ നടന്ന വെടിവയ്പ്പ് സംഭവങ്ങളിൽ ഉൾപ്പെട്ടിരുന്നു. മിൻപ ആക്രമണം എന്നറിയപ്പെടുന്ന ഈ ആക്രമണങ്ങളിൽ 26 സൈനികർ കൊല്ലപ്പെടുകയും 20 പേർക്ക് പരിക്കേൽക്കുകയും ചെയ്തു. ഈ ആക്രമണത്തിന് പിന്നാലെ കമ്മ്യൂണിസ്റ്റ് ഭീകരർ സൈനികരുടെ ആയുധങ്ങളും വെടിക്കോപ്പുകളും കൊള്ളയടിക്കുകയും ചെയ്തിരുന്നു. ഇന്ന് കീഴടങ്ങിയ മറ്റൊരു കമ്മ്യൂണിസ്റ്റ് ഭീകരൻ ഹങ്കി എന്ന റോഷ്‌നി സോദി, 2024-ൽ ഗോബൽ ഗ്രാമത്തിലെയും തുൾതുലി ഗ്രാമത്തിലെയും വനങ്ങളിൽ നടന്ന ഒരു പ്രധാന പോലീസ്-നക്സലൈറ്റ് ഏറ്റുമുട്ടലിൽ ഉൾപ്പെട്ടിരുന്നയാളാണ്.
Discussion about this post