ദിസ്പുർ : അസമിലെ നാഗോൺ ജില്ലയിലെ കയ്യേറ്റങ്ങൾ ഒഴിപ്പിക്കുന്നതിനായി ബുൾഡോസർ നടപടിയുമായി സർക്കാർ. സംരക്ഷിത വനഭൂമി കയ്യേറി വീടുകൾ നിർമ്മിച്ചു താമസിച്ചിരുന്ന 1500 ഓളം കുടുംബങ്ങളെ ഒഴിപ്പിച്ചു. അനധികൃത ബംഗ്ലാദേശി മുസ്ലിം കുടിയേറ്റക്കാരായിരുന്നു ഒഴിപ്പിക്കപ്പെട്ടവർ. ഒരു വൻ ബുൾഡോസർ നടപടിയിലൂടെ ഈ അനധികൃത കയ്യേറ്റങ്ങൾ എല്ലാം സർക്കാർ പൊളിച്ചു നീക്കി.
795 ഹെക്ടർ സംരക്ഷിത വനഭൂമിയിലെ കയ്യേറ്റം ഒഴിപ്പിക്കുന്നതിനുള്ള വൻ നടപടിയായിരുന്നു അസം സർക്കാർ സ്വീകരിച്ചത്. കനത്ത സുരക്ഷാ വിന്യസത്തിനിടയിലാണ് രാവിലെ ലുട്ടിമാരി പ്രദേശത്ത് കയ്യേറ്റങ്ങൾ ഒഴിപ്പിച്ചത്. ഈ സംരക്ഷിത വനഭൂമി അനധികൃതമായി കയ്യേറി താമസിച്ചിരുന്നവരോട് സ്ഥലം ഒഴിയാൻ ആവശ്യപ്പെട്ട് മൂന്നു മാസങ്ങൾക്ക് മുൻപ് തന്നെ അസം സർക്കാർ നോട്ടീസ് നൽകിയിരുന്നു. ആദ്യം രണ്ടുമാസത്തെ സമയപരിധി നൽകുകയും പിന്നീട് താമസക്കാരുടെ പ്രത്യേക അഭ്യർത്ഥന മാനിച്ച് ഒരു മാസത്തേക്ക് കൂടി സമയപരിധി നീട്ടി നൽകുകയും ചെയ്തു. തുടർന്നാണ് ഇപ്പോൾ എല്ലാ കയ്യേറ്റങ്ങളും സർക്കാർ ഒഴിപ്പിച്ചിരിക്കുന്നത്.
ഏകദേശം 40 വർഷത്തോളമായി സംരക്ഷിത വനഭൂമി കയ്യേറി താമസിച്ചിരുന്നവരും കുടിയൊഴിപ്പിക്കപ്പെട്ടവരുടെ കൂട്ടത്തിൽ ഉണ്ട്. കുടിയൊഴിപ്പിക്കപ്പെട്ടവരിൽ ഭൂരിഭാഗവും ബംഗാളി മുസ്ലിം കുടുംബങ്ങളാണ്. ഇവർ വർഷങ്ങൾക്കു മുൻപ് ഇവിടെ കുടിയേറിയവരാണ്. ഈ പ്രദേശം സംരക്ഷിത വനഭൂമി ആണെന്ന് അറിയില്ലെന്നായിരുന്നു കുടിയൊഴിപ്പിക്കപ്പെട്ടവർ വ്യക്തമാക്കിയിരുന്നത്. 2021 മെയ് മാസത്തിൽ അധികാരത്തിൽ വന്നതിനുശേഷം 160 ചതുരശ്ര കിലോമീറ്റർ ഭൂമി കയ്യേറ്റത്തിൽ നിന്ന് മോചിപ്പിച്ചതായി മുഖ്യമന്ത്രി ഹിമന്ത ബിശ്വ ശർമ്മ അറിയിച്ചു.
Discussion about this post