ന്യൂഡൽഹി : ഇന്ത്യൻ നിർമിത ആയുധങ്ങളിലുള്ള ലോകത്തിന്റെ വിശ്വാസത്തിന് അടിവരയിട്ടു കൊണ്ട് ഇന്ത്യയുടെ പിനാക ഗൈഡഡ് മിസൈലുകൾ അർമേനിയയിലേക്ക്. ഇന്ത്യ തദ്ദേശീയമായി നിർമ്മിച്ച പിനാക മൾട്ടിപ്പിൾ-ലോഞ്ച് റോക്കറ്റ് സിസ്റ്റത്തിന്റെ ആദ്യ ബാച്ച് ആണ് അർമേനിയയിലേക്ക് കയറ്റുമതി ചെയ്തിരിക്കുന്നത്. പ്രതിരോധ മന്ത്രി രാജ്നാഥ് സിംഗ് ആണ് ആദ്യ ബാച്ച് കയറ്റുമതിയുടെ ഫ്ലാഗ് ഓഫ് നിർവഹിച്ചത്.
നാഗ്പൂരിലെ സോളാർ ഡിഫൻസ് ആൻഡ് എയ്റോസ്പേസ് ലിമിറ്റഡ് (എസ്ഡിഎഎൽ) സൗകര്യത്തിൽ നിന്ന് പിനാക ഗൈഡഡ് മിസൈലുകളുടെ ആദ്യ കയറ്റുമതി അർമേനിയയിലേക്ക് അയച്ചതായി രാജ്നാഥ് സിംഗ് അറിയിച്ചു. പിനാക മൾട്ടി-ബാരൽ റോക്കറ്റ് ലോഞ്ചർ അതിന്റെ കൃത്യതയ്ക്കും ദീർഘദൂരത്തിനും പേരുകേട്ടതാണ്. പിനാകയുടെ നൂതന പതിപ്പുകൾക്ക് ഇപ്പോൾ 120 കിലോമീറ്റർ വരെയുള്ള ലക്ഷ്യങ്ങൾ കൈവരിക്കാൻ കഴിയും.
സ്വകാര്യ മേഖലയുടെ വർദ്ധിച്ചുവരുന്ന പങ്കാളിത്തം കാരണം, 10 വർഷം മുമ്പ് 1,000 കോടി രൂപയിൽ താഴെയായിരുന്ന ഇന്ത്യയുടെ പ്രതിരോധ കയറ്റുമതി ഇപ്പോൾ 24,000 കോടി രൂപയിലെ റെക്കോർഡിലെത്തിയെന്ന് രാജ്നാഥ് സിംഗ് പറഞ്ഞു. 2014 ൽ 46,425 കോടി രൂപ മാത്രമായിരുന്ന ആഭ്യന്തര പ്രതിരോധ ഉത്പാദനം ഇപ്പോൾ 1.51 ലക്ഷം കോടി രൂപയായി റെക്കോർഡ് നേട്ടം കൈവരിച്ചതായും പ്രതിരോധ മന്ത്രി അറിയിച്ചു.
Discussion about this post