അമൃതകാലത്തെ വികസിത് ഭാരതത്തിന്റെ കരുത്ത് വിളിച്ചോതി റെയിൽവേ രംഗത്ത് വമ്പൻ വിപ്ലവത്തിന് തുടക്കമിട്ട് കേന്ദ്ര സർക്കാർ. രാജ്യത്തെ പ്രധാന നഗരങ്ങളെ ബന്ധിപ്പിച്ചുകൊണ്ട് ഏഴ് പുതിയ അതിവേഗ റെയിൽ ഇടനാഴികൾ സ്ഥാപിക്കുമെന്ന് ധനമന്ത്രി നിർമല സീതാരാമൻ കേന്ദ്ര ബജറ്റ് 2026-ൽ പ്രഖ്യാപിച്ചു. ഭാരതത്തിന്റെ സാമ്പത്തിക വളർച്ചയെ ത്വരിതപ്പെടുത്തുന്ന ‘ഗ്രോത്ത് കണക്ടറുകൾ’ ആയിരിക്കും ഈ ഇടനാഴികളെന്ന് ബജറ്റ് പ്രസംഗത്തിൽ ധനമന്ത്രി വ്യക്തമാക്കി.
ലോകത്തിലെ ഏറ്റവും വലിയ ആധുനിക റെയിൽ ശൃംഖലയായി ഭാരതത്തെ മാറ്റുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്. നിലവിൽ നിർമ്മാണം പുരോഗമിക്കുന്ന മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതിക്ക് പിന്നാലെ രാജ്യം കാത്തിരുന്ന സുപ്രധാന പ്രഖ്യാപനമാണ് ഇത്തവണ ഉണ്ടായിരിക്കുന്നത്. പരിസ്ഥിതി സൗഹൃദവും ആധുനികവുമായ യാത്ര സൗകര്യം ഉറപ്പാക്കുന്നതിനൊപ്പം ചരക്ക് നീക്കത്തിനും ഈ ഇടനാഴികൾ വലിയ മുതൽക്കൂട്ടാകും.
പ്രഖ്യാപിക്കപ്പെട്ട ഏഴ് പ്രധാന ഇടനാഴികൾ:
മുംബൈ – പൂനെ: മഹാരാഷ്ട്രയുടെ സാമ്പത്തിക സിരകളെ കൂടുതൽ വേഗത്തിൽ ബന്ധിപ്പിക്കുന്നു.
ഹൈദരാബാദ് – പൂനെ: ദക്ഷിണേന്ത്യയും പടിഞ്ഞാറൻ ഭാരതവും തമ്മിലുള്ള ദൂരം കുറയ്ക്കുന്നു.
ഹൈദരാബാദ് – ബെംഗളൂരു: ഐടി നഗരങ്ങളെ കോർത്തിണക്കി സാങ്കേതിക മുന്നേറ്റത്തിന് വേഗം കൂട്ടുന്നു.
ചെന്നൈ – ബെംഗളൂരു: ദക്ഷിണേന്ത്യയിലെ പ്രധാന വ്യവസായ കേന്ദ്രങ്ങളെ അതിവേഗം ബന്ധിപ്പിക്കുന്നു.
ഡൽഹി – വാരണാസി: ദേശീയ തലസ്ഥാനത്തെ പുണ്യനഗരമായ വാരണാസിയുമായി ബന്ധിപ്പിക്കുന്നു.
വാരണാസി – സിലിഗുരി: ഉത്തരേന്ത്യയെ വടക്കുകിഴക്കൻ ഭാരതവുമായി അതിവേഗത്തിൽ ബന്ധിപ്പിക്കുന്ന തന്ത്രപ്രധാന പാത.
ചെന്നെെ – ഹൈദരാബാദ്: വാണിജ്യ മേഖലയുടെ വികസനത്തിന് കരുത്തുപകരുന്നു.
Discussion about this post