ന്യൂഡൽഹി : ഡൽഹി നിവാസികൾക്ക് സന്തോഷവാർത്ത. ഹോളി, ദീപാവലി ദിവസങ്ങളിൽ സൗജന്യ എൽപിജി സിലിണ്ടറുകൾ നൽകുന്ന പദ്ധതിക്ക് ഡൽഹി മന്ത്രിസഭ അംഗീകാരം നൽകി. ഡൽഹി നിയമസഭാ തെരഞ്ഞെടുപ്പിൽ ബിജെപി നൽകിയ തെരഞ്ഞെടുപ്പ് വാഗ്ദാനങ്ങളുടെ ഭാഗമാണ് ഈ പദ്ധതി. അധികാരത്തിൽ വന്നാൽ ഹോളി, ദീപാവലി ദിവസങ്ങളിൽ സൗജന്യ എൽപിജി സിലിണ്ടറുകൾ നൽകുമെന്ന് പാർട്ടി വോട്ടർമാർക്ക് ഉറപ്പ് നൽകിയിരുന്നു.
സൗജന്യ എൽപിജി സിലിണ്ടറുകൾ നൽകാനുള്ള തീരുമാനത്തിന് ഇന്ന് മന്ത്രിസഭ അംഗീകാരം നൽകിയെന്ന് തീരുമാനം പ്രഖ്യാപിച്ചുകൊണ്ട് മുഖ്യമന്ത്രി രേഖ ഗുപ്ത അറിയിച്ചു. ഡൽഹിയിലെ എല്ലാ റേഷൻ കാർഡ് ഉടമകൾക്കും ഹോളി, ദീപാവലി ദിവസങ്ങളിൽ സൗജന്യ സിലിണ്ടർ ലഭിക്കുമെന്നും ഈ പദ്ധതിക്കായി 242 കോടി രൂപ അനുവദിച്ചിട്ടുണ്ടെന്നും മുഖ്യമന്ത്രി വ്യക്തമാക്കി. PNG ഉപയോഗിക്കുന്ന റേഷൻ കാർഡ് ഉടമകളും ഈ പദ്ധതിയുടെ പരിധിയിൽ വരുമെന്നും പണം അക്കൗണ്ടിലേക്ക് നേരിട്ട് ട്രാൻസ്ഫർ ചെയ്യും എന്നും രേഖ ഗുപ്ത അറിയിച്ചു.
Discussion about this post