ടി20 ലോകകപ്പിലെ ഇന്ത്യയുടെ ആദ്യ പോരാട്ടത്തിന് മണിക്കൂറുകൾ മാത്രം ബാക്കിനിൽക്കെ, മനസ്സ് തുറന്ന് മലയാളി താരം സഞ്ജു സാംസൺ. “ഈ യാത്രയുടെ ഭാഗമാകാൻ കഴിഞ്ഞതിൽ വലിയ നന്ദിയുണ്ട്. ഈ കളിയോടും ഈ ടീമിനോടും ഉള്ള സ്നേഹം എന്നും ശക്തമായി തുടരും,” എന്ന് തുടങ്ങുന്ന സഞ്ജുവിന്റെ ഇൻസ്റ്റാഗ്രാം പോസ്റ്റ് ഇതിനോടകം വൈറലായിക്കഴിഞ്ഞു.
ഇന്ത്യ ഒന്നടങ്കം പിന്തുടരുന്ന ലോകകപ്പ് എന്ന സ്വപ്നത്തെക്കുറിച്ചാണ് സഞ്ജു പോസ്റ്റിൽ പരാമർശിക്കുന്നത്. 2007 ലെ പ്രഥമ ടി 20 ലോകകപ്പിൽ മിസ്ബാ ഉൾ ഹഖിന്റെ നിർണായക ക്യാച്ച് പിടിക്കുന്ന മലയാളത്തിലുടെ അഭിമാനം ശ്രീശാന്തിന്റെ വിഡിയോയും 2024 ടി 20 ലോകകപ്പിലെ വിജയനിമിഷവും ഒരുമിപ്പിച്ച് ആണ് സഞ്ജു വീഡിയോ പോസ്റ്റ് ചെയ്തത്. ഈ രണ്ട് ലോകകപ്പിലും ഇന്ത്യ ജയിക്കുമ്പോൾ അതിൽ ഒരു മലയാളി സാന്നിധ്യം ഉണ്ടെന്ന് സഞ്ജു എടുത്ത് പറഞ്ഞിരിക്കുന്നു.
“നമ്മൾ ഒരുമിച്ച് പിന്തുടരുന്ന ആ സ്വപ്നത്തിനായി നമുക്ക് എല്ലാം നൽകാം. നമുക്ക് മുന്നോട്ട് പോകാം,” എന്ന് സഞ്ജു കുറിച്ചു. പ്ലെയിങ് ഇലവനിലെ സ്ഥാനത്തെക്കുറിച്ച് ചർച്ചകൾ സജീവമായിരിക്കെ, ടീമിനോടുള്ള തന്റെ പ്രതിബദ്ധതയും കായികപ്രേമത്തോടുള്ള ആത്മാർത്ഥതയും വെളിപ്പെടുത്തുന്നതാണ് താരത്തിന്റെ ഈ വാക്കുകൾ.
കഴിഞ്ഞ കുറച്ച് ദിവസങ്ങളായി സഞ്ജുവിനെ ലോകകപ്പ് ഇലവനിൽ ഉൾപ്പെടുത്തണമെന്ന ആവശ്യവുമായി ആരാധകർ രംഗത്തുണ്ട്. ഇതിനിടയിൽ സഞ്ജു തന്നെ പോസിറ്റീവ് ആയ ഒരു സന്ദേശവുമായി എത്തിയത് ആരാധകർക്ക് വലിയ ആശ്വാസമായി. ഇന്ന് ഇന്ത്യയുടെ ആദ്യ മത്സരം നടക്കാനിരിക്കെ സഞ്ജു ഇലവനിൽ ഉണ്ടാകാനുള്ള സാധ്യത കുറവാണ് എന്നത് ആണ് റിപ്പോർട്ടുകൾ.
