രാഷ്ട്രീയ സ്വയംസേവക് സംഘിന്റെ (RSS) നൂറാം വാർഷികത്തോടനുബന്ധിച്ച് മുംബൈയിൽ സംഘടിപ്പിച്ച വിപുലമായ ആഘോഷങ്ങളിൽ ബോളിവുഡിലെ പ്രമുഖ താരങ്ങൾ അണിനിരന്നു. ‘ശതക്: രാഷ്ട്രീയ സ്വയംസേവക് സംഘിന്റെ 100 വർഷങ്ങൾ’ എന്ന പ്രമേയത്തിൽ നടന്ന പരിപാടിയിൽ സിനിമ-സാംസ്കാരിക മേഖലയിലെ നിരവധി പേർ പങ്കെടുത്തു.
സൽമാൻ ഖാൻ, രൺബീർ കപൂർ എന്നിവർ ആദ്യ ദിനത്തിലെ ചടങ്ങുകളിൽ സാന്നിധ്യമറിയിച്ചു. രണ്ടാം ദിവസം അക്ഷയ് കുമാർ, വിക്കി കൗശൽ, കരൺ ജോഹർ, അനന്യ പാണ്ഡെ, ശില്പ ഷെട്ടി തുടങ്ങിയ വലിയ താരനിര തന്നെ എത്തിച്ചേർന്നു. രാമായണം സിനിമയുടെ സംവിധായകൻ നിതേഷ് തിവാരിയും രൺബീറിനൊപ്പമുണ്ടായിരുന്നു. ആർ.എസ്.എസ് സർ സംഘചാലക് മോഹൻ ജി ഭാഗവത് പരിപാടിയെ അഭിസംബോധന ചെയ്ത് സംസാരിച്ചു.
മോഹൻ ഭാഗവതിന്റെ ആശയങ്ങൾ പ്രചോദനകരമാണെന്നും ബോളിവുഡ് വ്യക്തിത്വങ്ങൾക്ക് സമയം അനുവദിച്ചതിന് നന്ദിയുണ്ടെന്നും കരൺ ജോഹർ പറഞ്ഞു. മോഹൻ ഭാഗവതിന്റെ പ്രസംഗം നേരിട്ട് കേൾക്കാൻ കഴിഞ്ഞതിൽ സന്തോഷമുണ്ടെന്നും അത് തന്നെ വളരെയധികം സ്വാധീനിച്ചെന്നും വിക്കി കൗശൽ പ്രതികരിച്ചു. യുവാക്കൾ സൽമാൻ ഖാന്റെ ഫാഷൻ പിന്തുടരുന്നതുപോലെ, സമൂഹത്തിലെ നല്ല മൂല്യങ്ങളും ഒരു ഫാഷനായി പിന്തുടരണമെന്ന് മോഹൻ ഭാഗവത് ചടങ്ങിൽ പരാമർശിച്ചു.
