മുംബൈ: ബംഗ്ലാദേശിലെ ഹിന്ദുക്കൾ നേരിടുന്ന അതിക്രമങ്ങളിൽ ശക്തമായ മുന്നറിയിപ്പും പിന്തുണയുമായി ആർ.എസ്.എസ് സർസംഘചാലക് ഡോ. മോഹൻ ഭാഗവത്. മുംബൈയിൽ സംഘടിപ്പിച്ച ‘സംഘയാത്രയുടെ 100 വർഷങ്ങൾ – പുതിയ ചക്രവാളങ്ങൾ’ എന്ന പരിപാടിയുടെ രണ്ടാം ദിനത്തിൽ സംസാരിക്കുകയായിരുന്നു അദ്ദേഹം.
ബംഗ്ലാദേശിൽ ഇന്നും ഏതാണ്ട് ഒന്നേകാൽ കോടിയോളം ഹിന്ദുക്കൾ ഉണ്ടെന്ന് അദ്ദേഹം ഓർമ്മിപ്പിച്ചു. തങ്ങളുടെ അവകാശങ്ങൾക്കായി അവിടെത്തന്നെ ഉറച്ചുനിന്ന് പോരാടാനാണ് അവർ തീരുമാനിക്കുന്നതെങ്കിൽ, ഭാരതത്തിലെയും ലോകമെമ്പാടുമുള്ളതുമായ ഹിന്ദു സമൂഹം അവർക്ക് പിന്നിൽ അണിനിരക്കുമെന്ന് സർസംഘചാലക് ഉറപ്പുനൽകി. ഭീരുക്കളെപ്പോലെ ഓടിയൊളിക്കാതെ പ്രതിരോധിക്കാൻ തയ്യാറായാൽ ലോകം അവരെ ആദരിക്കുമെന്നും അദ്ദേഹം പറഞ്ഞു.
അനധികൃത കുടിയേറ്റത്തിനെതിരെ ജാഗ്രത ഭാരതത്തിനുള്ളിലെ സുരക്ഷയെക്കുറിച്ചും അദ്ദേഹം സുപ്രധാനമായ നിർദ്ദേശങ്ങൾ നൽകി. രാജ്യത്ത് അനധികൃതമായി തങ്ങുന്ന വിദേശികളെ കണ്ടെത്താൻ ഓരോ പൗരനും ജാഗ്രത പുലർത്തണം. സംശയാസ്പദമായ രീതിയിൽ വിദേശികളെ കണ്ടാൽ ഉടൻ തന്നെ പോലീസിനെ വിവരമറിയിക്കണം. അത്തരക്കാർക്ക് ആരും തൊഴിൽ നൽകരുത്. “നമ്മുടെ നാട്ടുകാർക്ക് തൊഴിൽ നൽകുക, അനധികൃതമായി തങ്ങുന്ന വിദേശികൾക്ക് ജോലി നൽകരുത്” എന്ന് അദ്ദേഹം ആഹ്വാനം ചെയ്തു.
ഭാരതം ഒന്നിച്ച് നിൽക്കും ഭാരതത്തെ വിഭജിക്കാൻ ആരെയും അനുവദിക്കില്ലെന്ന് അദ്ദേഹം വ്യക്തമാക്കി. ഭാരതത്തെ തകർക്കാൻ ശ്രമിക്കുന്നവർ സ്വയം തകരും. സംഘം ആർക്കും എതിരല്ലെന്നും, എന്നാൽ ഹിന്ദു സമാജത്തിന്റെ ഐക്യവും സുരക്ഷയും ഉറപ്പാക്കാൻ പ്രതിജ്ഞാബദ്ധമാണെന്നും ഡോ. മോഹൻ ഭാഗവത് കൂട്ടിച്ചേർത്തു. ബംഗ്ലാദേശിലെ ഹിന്ദുക്കൾക്ക് ആത്മവിശ്വാസം നൽകുന്നതിനൊപ്പം രാജ്യത്തിന്റെ ആഭ്യന്തര സുരക്ഷയിൽ സ്വയംസേവകർക്കും പൊതുജനങ്ങൾക്കും ഉണ്ടാകേണ്ട ഉത്തരവാദിത്ത്വത്തെക്കുറിച്ചും പ്രസംഗം വ്യക്തമാക്കുന്നു.
Discussion about this post