എത്തനോൾ മിശ്രിത ഇന്ധന നയവുമായി
ബന്ധപ്പെട്ട് ഉയർന്നുവന്ന സാമ്പത്തിക താല്പര്യ ആരോപണങ്ങൾ പൂർണ്ണമായും തള്ളി കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി. കേന്ദ്ര സർക്കാരിന്റെ എത്തനോൾ നയം മൂലം തനിക്കോ തന്റെ കുടുംബത്തിനോ യാതൊരുവിധ വ്യക്തിപരമായ നേട്ടവുമില്ലെന്ന് ഇന്ത്യാ ടുഡേ ടിവിക്ക് നൽകിയ പ്രത്യേക അഭിമുഖത്തിൽ അദ്ദേഹം വ്യക്തമാക്കി. ഈ വിവാദങ്ങൾക്ക് പിന്നിൽ കൃത്യമായ രാഷ്ട്രീയ ഗൂഢാലോചനയും ഇന്ധന ഇറക്കുമതി ലോബിയുടെ ഇടപെടലുകളുമുണ്ടെന്നാണ് മന്ത്രി ആരോപിക്കുന്നത്.
സർക്കാർ എത്തനോൾ നയം കൊണ്ടുവരുന്നതിന് എത്രയോ വർഷങ്ങൾക്ക് മുമ്പ് തന്നെ തന്റെ കുടുംബം പഞ്ചസാര ബിസിനസ്സ് രംഗത്തുണ്ട്. രാജ്യത്തെ ആകെ എത്തനോൾ ഉൽപാദനത്തിൽ വെറും 0.07 ശതമാനം മാത്രമാണ് തന്റെ പങ്കാളിത്തം. ഇത്രയും ചെറിയൊരു പങ്ക് കൈവശമുള്ള ഒരാൾക്ക് ഈ നയം വഴി എന്ത് സാമ്പത്തിക നേട്ടമാണ് ഉണ്ടാകാനുള്ളതെന്ന് ഗഡ്കരി ചോദിച്ചു. സ്വന്തം താല്പര്യങ്ങൾ സംരക്ഷിക്കാൻ വേണ്ടിയാണ് ഈ നയം രൂപീകരിച്ചതെന്ന ആരോപണം പൂർണ്ണമായും അടിസ്ഥാനരഹിതമാണ്. പെട്രോളിയം മന്ത്രാലയവും ക്യാബിനറ്റും ശാസ്ത്രജ്ഞരും ഉൾപ്പെടെയുള്ളവർ കൃത്യമായ പഠനങ്ങളും വിപുലമായ കൂടിയാലോചനകളും നടത്തിയ ശേഷമാണ് രാജ്യം ഈ തീരുമാനത്തിലേക്ക് എത്തിയത്. ഇത് താൻ ഒറ്റയ്ക്ക് എടുത്ത തീരുമാനമല്ലെന്നും അദ്ദേഹം കൂട്ടിച്ചേർത്തു.
പെട്രോളിൽ 20 ശതമാനം എത്തനോൾ ചേർത്ത ‘ഇ 20’ (E20) ഇന്ധനം ഉപയോഗിക്കുന്നത് വഴി വാഹനങ്ങളുടെ എഞ്ചിനുകൾക്ക് കേടുപാടുകൾ സംഭവിക്കുന്നുവെന്ന പ്രചാരണങ്ങളെയും മന്ത്രി ശക്തമായി നേരിട്ടു. പുതിയ ഇന്ധനം കാരണം ഏതെങ്കിലും പെട്രോൾ വാഹനത്തിന് കേടുപാടുകൾ സംഭവിച്ചതായി തെളിയിക്കാൻ അദ്ദേഹം വിമർശകരെ വെല്ലുവിളിച്ചു. ഇത്തരത്തിൽ ഇന്ധനം കാരണം എഞ്ചിൻ തകരാറിലായ രണ്ട് പേരുടെയെങ്കിലും പേര് കൃത്യമായ തെളിവുകളോടെ പുറത്തുവിടാൻ സാധിക്കുമോ എന്നും ഗഡ്കരി ചോദിച്ചു.
വാഹനങ്ങൾക്ക് എന്തെങ്കിലും തകരാർ സംഭവിച്ചിട്ടുണ്ടെങ്കിൽ അത് ഡീലർമാർക്കോ മന്ത്രാലയത്തിനോ പരാതിയായി നൽകാം. അതിൽ കൃത്യമായ അന്വേഷണം നടത്തി പരിഹാരം കാണും. മാരുതി സുസുക്കി, ടൊയോട്ട, ടാറ്റ, മഹിന്ദ്ര തുടങ്ങിയ പ്രമുഖ വാഹന നിർമ്മാതാക്കളാരും തന്നെ എത്തനോൾ ഇന്ധനം കാരണം വാഹനങ്ങൾക്ക് തകരാർ സംഭവിച്ചതായി ഇതുവരെ റിപ്പോർട്ട് ചെയ്തിട്ടില്ല. അടുത്തിടെ ഒരു ടൊയോട്ട വാഹനത്തിന് തകരാർ സംഭവിച്ചതായി ഉയർന്ന പരാതിയിൽ നടത്തിയ അന്വേഷണത്തിൽ പ്രശ്നം എത്തനോൾ അല്ലെന്നും ഇന്ധനത്തിൽ വെള്ളം കലർന്നതാണെന്നും കണ്ടെത്തിയിട്ടുണ്ടെന്ന് മന്ത്രി ചൂണ്ടിക്കാട്ടി. നാല് വർഷത്തോളം നീണ്ട കൃത്യമായ പരീക്ഷണങ്ങൾക്കും ലക്ഷക്കണക്കിന് കിലോമീറ്ററുകൾ ഓടിച്ചുള്ള പരിശോധനകൾക്കും ശേഷമാണ് ഇത്തരം ഇന്ധനങ്ങൾക്ക് അനുമതി നൽകുന്നത്.
ഇന്ത്യ നിലവിൽ പ്രതിവർഷം 1,500 കോടി ലിറ്റർ എത്തനോളാണ് ഉൽപ്പാദിപ്പിക്കുന്നത്. ഏകദേശം 550 ഉൽപ്പാദന യൂണിറ്റുകൾ രാജ്യത്തുണ്ട്. ഫോസിൽ ഇന്ധനങ്ങളുടെ ഇറക്കുമതി കുറയ്ക്കുക, പരിസ്ഥിതി മലിനീകരണം തടയുക, കർഷകരുടെ വരുമാനം വർദ്ധിപ്പിക്കുക എന്നീ ലക്ഷ്യത്തോടെയാണ് രാജ്യം മുന്നോട്ട് പോകുന്നത്. യുഎസ്, ബ്രസീൽ, ജപ്പാൻ, ജർമ്മനി തുടങ്ങിയ പ്രമുഖ രാജ്യങ്ങളിലെല്ലാം വിജയകരമായി നടപ്പിലാക്കിയ ആഗോള മാതൃകയാണ് ഇന്ത്യയും പിന്തുടരുന്നത്. തന്നെ വ്യക്തിപരമായി അധിക്ഷേപിക്കാനും കർഷകർക്ക് ഗുണകരമാകുന്ന ഈ വലിയ പദ്ധതിയെ തകർക്കാനും ചില ലോബികൾ ബോധപൂർവ്വം നടത്തുന്ന ശ്രമങ്ങളുടെ ഭാഗമാണ് ഈ വ്യാജ പ്രചാരണങ്ങളെന്നും നിതിൻ ഗഡ്കരി വ്യക്തമാക്കി.
