ഭുവനേശ്വർ : ഇന്ത്യൻ പ്രതിരോധ ഗവേഷണ വികസന സംഘടന (DRDO) പുതിയ ‘പിനാക ലോങ് റേഞ്ച് ഗൈഡഡ് റോക്കറ്റ്’ (LRGR) വിജയകരമായി പരീക്ഷിച്ചു. ഒഡീഷയിലെ ചാന്ദിപൂർ ടെസ്റ്റ് റേഞ്ചിൽ വെച്ചായിരുന്നു പരീക്ഷണം. പരീക്ഷണത്തിനിടയിൽ ആസൂത്രണം ചെയ്ത എല്ലാ വ്യോമ നീക്കങ്ങളും പൂർത്തിയാക്കിയ റോക്കറ്റ്, മുൻകൂട്ടി നിശ്ചയിച്ച പാതയിലൂടെ കൃത്യമായി സഞ്ചരിച്ച് ലക്ഷ്യസ്ഥാനത്ത് അതീവ കൃത്യതയോടെ പതിച്ചതായി കേന്ദ്ര പ്രതിരോധ മന്ത്രാലയം ഔദ്യോഗികമായി അറിയിച്ചു. 60 കിലോമീറ്റർ ദൂര പരിധിയിലാണ് ഈ അത്യാധുനിക റോക്കറ്റിന്റെ കൃത്യതയും പ്രവർത്തനവും ഇന്ത്യൻ സൈന്യം പരിശോധിച്ചത്. ഇന്ത്യയുടെ തദ്ദേശീയ പ്രതിരോധ ശേഷി വർദ്ധിപ്പിക്കുന്നതിൽ ഈ റോക്കറ്റ് വലിയൊരു നാഴികക്കല്ലായാണ് വിലയിരുത്തപ്പെടുന്നത്.
ഡിആർഡിഒയുടെ കീഴിലുള്ള വിവിധ ഗവേഷണ ലാബുകൾ ചേർന്നാണ് ഈ അത്യാധുനിക ഗൈഡഡ് റോക്കറ്റ് വികസിപ്പിച്ചെടുത്തത്. ഈ പുതിയ നേട്ടത്തിൽ പ്രതിരോധ മന്ത്രി രാജ്നാഥ് സിംഗ് ഡിആർഡിഒയെയും ഇന്ത്യൻ സൈന്യത്തെയും അഭിനന്ദിച്ചു. പ്രധാനമന്ത്രിയുടെ ‘ആത്മനിർഭർ ഭാരത്’ പദ്ധതിക്ക് ഈ വിജയം വലിയ കരുത്ത് പകരുമെന്നും അദ്ദേഹം പറഞ്ഞു. ഡിആർഡിഒ ചെയർമാൻ രാജേഷ് കുമാർ സിംഗ് ആണ് ഈ പരീക്ഷണ പ്രവർത്തനങ്ങൾക്ക് നേരിട്ട് മേൽനോട്ടം വഹിച്ചത്. ഡിആർഡിഒയുടെ കീഴിലുള്ള പ്രമുഖ ലാബുകളായ അർമാമെന്റ് റിസർച്ച് ആൻഡ് ഡെവലപ്മെന്റ് എസ്റ്റാബ്ലിഷ്മെന്റ് (ARDE), ഹൈ എനർജി മെറ്റീരിയൽസ് റിസർച്ച് ലബോറട്ടറി (HEMRL) എന്നിവ ഡിഫൻസ് റിസർച്ച് ആൻഡ് ഡെവലപ്മെന്റ് ലബോറട്ടറി (DRDL), റിസർച്ച് സെന്റർ ഇമ്രത്ത് (RCI) എന്നിവയുടെ പിന്തുണയോടെയാണ് ഈ റോക്കറ്റ് രൂപകൽപ്പന ചെയ്തത്. ഇന്റഗ്രേറ്റഡ് ടെസ്റ്റ് റേഞ്ചും പ്രൂഫ് ആൻഡ് എക്സ്പിരിമെന്റൽ എസ്റ്റാബ്ലിഷ്മെന്റും സംയുക്തമായാണ് ഈ പരീക്ഷണ പ്രവർത്തനങ്ങൾ ഏകോപിപ്പിച്ചത്.
ഇന്ത്യൻ സൈന്യത്തിന്റെ യുദ്ധവീര്യവും ആക്രമണ ശേഷിയും അടിമുടി മാറ്റാൻ പോകുന്ന ഒരു സാങ്കേതികവിദ്യയാണ് പിനാക ലോങ് റേഞ്ച് ഗൈഡഡ് റോക്കറ്റ്. ശത്രുക്കളുടെ താവളങ്ങളെയും മിസൈൽ വിന്യാസങ്ങളെയും കിലോമീറ്ററുകൾ അകലെ നിന്ന് തന്നെ അതീവ കൃത്യതയോടെ തകർക്കാൻ ഇതിലെ ഗൈഡൻസ് ആൻഡ് നാവിഗേഷൻ സംവിധാനങ്ങൾക്ക് സാധിക്കും. നിലവിൽ ഉപയോഗിക്കുന്ന പിനാക ലോഞ്ചറുകളിൽ നിന്ന് തന്നെ ഈ പുതിയ ലോങ് റേഞ്ച് റോക്കറ്റും വിക്ഷേപിക്കാൻ കഴിയും. ഒരേ ലോഞ്ചറിൽ നിന്ന് വിവിധ ദൂരപരിധിയുള്ള റോക്കറ്റുകൾ അയക്കാൻ സാധിക്കുന്നത് സൈന്യത്തിന്റെ ആക്രമണ ശേഷി ഇരട്ടിയാക്കുന്നതാണ്. ഇത് വിദേശ രാജ്യങ്ങളിൽ നിന്നുള്ള ആയുധ ഇറക്കുമതി കുറയ്ക്കാനും സഹായിക്കും.
