ന്യൂഡൽഹി :
ലോക്സഭാ സ്പീക്കർ ഓം ബിർളയ്ക്കെതിരെ കോൺഗ്രസ് ചൊവ്വാഴ്ച ലോക്സഭാ സെക്രട്ടറി ജനറലിന് അവിശ്വാസ പ്രമേയ നോട്ടീസ് സമർപ്പിച്ചു. 118 എംപിമാർ അവിശ്വാസ പ്രമേയത്തിൽ ഒപ്പുവെച്ചു. തൃണമൂൽ കോൺഗ്രസ് അവിശ്വാസപ്രമേയത്തെ പിന്തുണച്ചില്ല.
പാർലമെന്ററി ജനാധിപത്യത്തിന്റെ അന്തസ്സ് ഉയർത്തിപ്പിടിച്ചാണ് രാഹുൽ ഗാന്ധി ലോക്സഭാ സ്പീക്കറിനെതിരായ അവിശ്വാസ പ്രമേയത്തിൽ ഒപ്പുവെച്ചതെന്ന് കോൺഗ്രസ് പ്രസ്താവനയിൽ അറിയിച്ചു. സ്പീക്കറിനെതിരായ അവിശ്വാസ പ്രമേയത്തിനുള്ള നോട്ടീസിൽ പ്രതിപക്ഷ നേതാവ് ഒപ്പിടുന്നത് ഉചിതമല്ലെന്ന് നേരത്തെ ചില പാർട്ടികൾ സൂചിപ്പിച്ചിരുന്നു. രാഷ്ട്രപതിയുടെ പ്രസംഗത്തിനുള്ള നന്ദി പ്രമേയ ചർച്ചയ്ക്കിടെ, പ്രസിദ്ധീകരിക്കാത്ത പുസ്തകങ്ങളോ ലേഖനങ്ങളോ ലോക്സഭയിൽ അവതരിപ്പിക്കാൻ സാധിക്കില്ലെന്ന് വ്യക്തമാക്കി സ്പീക്കർ പ്രതിപക്ഷ നേതാവിന്റെ പ്രസംഗം തടഞ്ഞതിനെ തുടർന്നാണ് പ്രതിപക്ഷം അവിശ്വാസപ്രമേയം കൊണ്ടുവന്നിരിക്കുന്നത്.
ഫെബ്രുവരി 2 മുതൽ ലോക്സഭയിൽ കോലാഹലങ്ങൾ നിറഞ്ഞ രംഗങ്ങൾ അരങ്ങേറുന്നുണ്ട്. കഴിഞ്ഞ ആഴ്ച, ബഹളത്തിനിടയിൽ, എട്ട് പ്രതിപക്ഷ എംപിമാരെ സമ്മേളനത്തിന്റെ ശേഷിക്കുന്ന സമയത്തേക്ക് സസ്പെൻഡ് ചെയ്തിരുന്നു.
