ഇന്ത്യയുടെ ഭരണസിരാകേന്ദ്രത്തിൽ ഇന്ന് ചരിത്രപരമായ മാറ്റം. ബ്രിട്ടീഷ് കാലഘട്ടത്തിലെ സൗത്ത് ബ്ലോക്കിൽ നിന്ന് പ്രധാനമന്ത്രിയുടെ ഓഫീസ് പുത്തൻ സമുച്ചയമായ സേവാ തീർത്ഥിലേക്ക് മാറുന്നു. ഇന്ന്, പ്രധാനമന്ത്രി നരേന്ദ്ര മോദി ഈ അത്യാധുനിക സമുച്ചയം ഉദ്ഘാടനം ചെയ്യും.
ഡൽഹിയിലെ സെൻട്രൽ വിസ്ത പുനർനിർമ്മാണ പദ്ധതിയുടെ ഭാഗമായി കർത്തവ്യ പഥിൽ നിർമ്മിച്ച ‘സേവാ തീർത്ഥ്’, ‘കർത്തവ്യ ഭവൻ-1’, ‘കർത്തവ്യ ഭവൻ-2’ എന്നീ മന്ദിരങ്ങൾ ഭാരതത്തിന്റെ ഭരണനിർവ്വഹണത്തിൽ വലിയൊരു നാഴികക്കല്ലാകും.
എന്താണ് സേവാ തീർത്ഥ്?
പ്രധാനമന്ത്രിയുടെ ഓഫീസ് നാഷണൽ സെക്യൂരിറ്റി കൗൺസിൽ സെക്രട്ടേറിയറ്റ്, ക്യാബിനറ്റ് സെക്രട്ടേറിയറ്റ് എന്നിവ ഇനി സേവാ തീർത്ഥിലായിരിക്കും പ്രവർത്തിക്കുക. ഇന്ന് ഉച്ചയ്ക്ക് 1:30-ന് പ്രധാനമന്ത്രി കെട്ടിടത്തിന്റെ പേര് അനാവരണം ചെയ്യുകയും വൈകുന്നേരം 6 മണിയോടെ പൊതുപരിപാടിയെ അഭിസംബോധന ചെയ്യുകയും ചെയ്യും.
കർത്തവ്യ ഭവൻ 1, 2 സമുച്ചയങ്ങളിലായി രാജ്യത്തെ ഏറ്റവും പ്രധാനപ്പെട്ട മന്ത്രാലയങ്ങൾ പ്രവർത്തിക്കും. ധനകാര്യം, പ്രതിരോധം, ആരോഗ്യം, വിദ്യാഭ്യാസം, സാംസ്കാരികം, നിയമം, കൃഷി, വിവരം-പ്രക്ഷേപണം, ഗോത്രക്ഷേമം എന്നിവയുടെ പ്രവർത്തനം ഇനി ഈ സമുച്ചയങ്ങളിലായിരിക്കും.
ഡിജിറ്റൽ സംയോജിത ഓഫീസുകൾ, ഏകീകൃത റിസപ്ഷനുകൾ, പൊതുജനങ്ങൾക്ക് വേണ്ടിയുള്ള പ്രത്യേക സമ്പർക്ക മേഖലകൾ എന്നിവ പുതിയ സമുച്ചയത്തിന്റെ പ്രത്യേകതയാണ്. 4-സ്റ്റാർ GRIHA മാനദണ്ഡങ്ങൾ പാലിച്ചാണ് ഇതിന്റെ നിർമ്മാണം.
