‘AI ആരുടെയും തൊഴിൽ ഇല്ലാതാക്കില്ല, മറിച്ച് കൂടുതൽ പുതിയ അവസരങ്ങൾ സൃഷ്ടിക്കും’ ; യുവാക്കളുടെ നൈപുണ്യ വികസനം സർക്കാരിന്റെ പ്രധാന ലക്ഷ്യമെന്ന് മോദി

ന്യൂഡൽഹി : ഇന്ത്യൻ യുവാക്കളുടെ നൈപുണ്യ വികസനം സർക്കാരിന്റെ പ്രധാന ലക്ഷ്യങ്ങളിൽ ഒന്നാണെന്ന് പ്രധാനമന്ത്രി നരേന്ദ്ര മോദി. ഇന്ത്യയിലെ യുവാക്കളുമായി ബന്ധപ്പെട്ട വർദ്ധിച്ചുവരുന്ന ആശങ്കകളെയും മനുഷ്യ ജോലികൾക്ക് പകരം കൃത്രിമബുദ്ധി ഉപയോഗിക്കുന്നതിനെയും പ്രധാനമന്ത്രി മോദി അഭിസംബോധന ചെയ്തു. എഐ തൊഴിലവസരങ്ങൾ ഇല്ലാതാകുമോ എന്ന് ആർക്കും യാതൊരു ആശങ്കയും വേണ്ട. മറിച്ച് അത് കൂടുതൽ അവസരങ്ങൾ സൃഷ്ടിക്കുകയാണ് ചെയ്യുക എന്നും പ്രധാനമന്ത്രി അറിയിച്ചു.

ഭയത്തെ ചെറുക്കാനുള്ള ഏറ്റവും നല്ല മാർഗം തയ്യാറെടുപ്പാണെന്നും പ്രധാനമന്ത്രി വ്യക്തമാക്കി. AI-യെ ഒരു ഭീഷണിയായി കാണുന്നതിനുപകരം, അതിനെ നേരിടാൻ തയ്യാറാകുക എന്നാണ്. AI-അധിഷ്ഠിത ഭാവിക്കായി ആളുകളെ നൈപുണ്യവൽക്കരിക്കുന്നതിലും പുനർനിർമ്മിക്കുന്നതിലും സർക്കാർ നിക്ഷേപം നടത്തിവരികയാണ്. ഭാവിയിലെ എല്ലാ പ്രശ്നങ്ങളെയും നേരിടാനുള്ള തയ്യാറെടുപ്പ് ഇന്ത്യ നടത്തുന്നുണ്ട് എന്നും പ്രധാനമന്ത്രി അഭിപ്രായപ്പെട്ടു.

വ്യാവസായിക വിപ്ലവം മുതൽ ഇന്നുവരെ, പുതിയ കണ്ടുപിടുത്തങ്ങൾ എപ്പോഴും പുതിയ തരം തൊഴിലുകൾ കൊണ്ടുവന്നിട്ടുണ്ട്. മുൻപത്തേക്കാൾ മെച്ചപ്പെട്ട തൊഴിലവസരങ്ങൾ ആണ് പുതിയ കണ്ടുപിടുത്തങ്ങളിലൂടെ സൃഷ്ടിക്കപ്പെട്ടിട്ടുള്ളത്. സാങ്കേതിക വിദ്യകൾ കാരണം ഒരിക്കലും ജോലികൾ ഇല്ലാതാകില്ല. പകരം ജോലികളുടെ രൂപം മാറും എന്ന് മാത്രമാണുള്ളത്. സമീപഭാവിയിലും ഇതുതന്നെ സംഭവിക്കും; AI ഉപയോഗിച്ച്, കൂടുതൽ തരം ജോലികൾ കണ്ടുപിടിക്കപ്പെടുകയും ഘടനാപരമായി ക്രമീകരിക്കപ്പെടുകയും ചെയ്യും, എന്നും പ്രധാനമന്ത്രി മോദി വ്യക്തമാക്കി.