മുംബൈ : മഹാരാഷ്ട്ര രാഷ്ട്രീയത്തിൽ പുതിയ കോളിളക്കം സൃഷ്ടിച്ച് മഹാരാഷ്ട്ര നവനിർമ്മാൺ സേന മേധാവി രാജ് താക്കറെ. ശിവസേന ഷിൻഡെ വിഭാഗം നേതാവും മഹാരാഷ്ട്ര ഉപ മുഖ്യമന്ത്രിയുമായ ഏക്നാഥ് ഷിൻഡെയുമായി രാജ് താക്കറെ ഇന്ന് കൂടിക്കാഴ്ച നടത്തി. ബിഎംസി തിരഞ്ഞെടുപ്പിന് മുന്നോടിയായി ശിവസേന ഉദ്ദവ് വിഭാഗവുമായി എംഎൻഎസ് സഖ്യം ചേർന്നിരുന്നെങ്കിലും തിരഞ്ഞെടുപ്പിൽ കനത്ത പരാജയം ആയിരുന്നു നേരിടേണ്ടി വന്നിരുന്നത്. ഈ സാഹചര്യത്തിൽ എതിരാളികളായ ഷിൻഡെ വിഭാഗം നേതാവുമായി രാജ് താക്കറെ കൂടിക്കാഴ്ച നടത്തിയത് വലിയ ചർച്ചകൾക്കാണ് വഴി വച്ചിരിക്കുന്നത്.
ബിഎംസി (ബ്രിഹൻമുംബൈ മുനിസിപ്പൽ കോർപ്പറേഷൻ) തിരഞ്ഞെടുപ്പിന് ശേഷം ഇരു നേതാക്കളും തമ്മിലുള്ള ആദ്യ നേരിട്ടുള്ള കൂടിക്കാഴ്ചയായിരുന്നു ഇത്. ഇരു നേതാക്കളും ദീർഘനേരം സംസാരിച്ചു. മുമ്പ്, ചില എംഎൻഎസ് കോർപ്പറേറ്റർമാർ ഏക്നാഥ് ഷിൻഡെയുടെ ശിവസേനയെ പിന്തുണച്ചിരുന്നു. കൂടാതെ രാജ് താക്കറെ ഒരിക്കലും വ്യക്തിപരമായ നേട്ടം നോക്കിയിട്ടില്ലെന്നും എല്ലായ്പ്പോഴും വിശാലമായ കാഴ്ചപ്പാടോടെ തീരുമാനങ്ങൾ എടുക്കാറുണ്ടെന്നും ഏതാനും ദിവസങ്ങൾക്കു മുൻപ് ഏക്നാഥ് ഷിൻഡെ അദ്ദേഹത്തെ പ്രശംസിച്ചിരുന്നു.
കഴിഞ്ഞ മാസം നടന്ന ബിഎംസി തിരഞ്ഞെടുപ്പിൽ, രാജ് താക്കറെയും ഉദ്ധവ് താക്കറെയും ഏകദേശം രണ്ട് പതിറ്റാണ്ടുകൾക്ക് ശേഷം ഒരുമിച്ച് കാണപ്പെട്ടു. ഈ കൂടിക്കാഴ്ച രാഷ്ട്രീയമായി പ്രാധാന്യമുള്ളതായിരുന്നു, പക്ഷേ തിരഞ്ഞെടുപ്പ് ഫലം അവരുടെ പ്രതീക്ഷകളെ തകിടം മറിച്ചതായിരുന്നു. ബിഎംസിയിൽ താക്കറെ കുടുംബത്തിന്റെ നേതൃത്വത്തിലുള്ള അവിഭക്ത ശിവസേനയുടെ ഏകദേശം മൂന്ന് പതിറ്റാണ്ട് നീണ്ടുനിന്ന ആധിപത്യം അവസാനിപ്പിച്ചാണ് ഇത്തവണ ബിജെപി മുനിസിപ്പൽ കോർപ്പറേഷൻ പിടിച്ചെടുത്തത്.
Discussion about this post