ഇന്ത്യൻ ക്രിക്കറ്റ് ചരിത്രത്തിൽ ഇതുവരെ മറ്റൊരു താരത്തിനും അവകാശപ്പെടാനില്ലാത്ത അപൂർവ്വ നേട്ടമാണ് ഹാർദിക് പാണ്ഡ്യ സ്വന്തമാക്കിയത്. ബാറ്റിംഗിലും ബൗളിംഗിലും ഒരുപോലെ മികവ് പുലർത്തുന്ന താരം ഇന്ത്യയുടെ ‘ഏറ്റവും മൂല്യമുള്ള താരം’ (MVP) ആണെന്ന് ഒരിക്കൽ കൂടി തെളിയിച്ചിരിക്കുകയാണ്.
ടി20 ഫോർമാറ്റിൽ 6000 റൺസ് കടക്കുന്നതിനൊപ്പം 200 വിക്കറ്റുകളും വീഴ്ത്തുന്ന ആദ്യ ഇന്ത്യൻ താരമായി ഹാർദിക് മാറി. ലോക ക്രിക്കറ്റിൽ തന്നെ വിരലിലെണ്ണാവുന്ന താരങ്ങൾക്ക് മാത്രമാണ് ഈ ‘ഡബിൾ’ നേട്ടം സ്വന്തമാക്കാൻ കഴിഞ്ഞിട്ടുള്ളത്. ഫിനിഷർ എന്ന നിലയിലുള്ള ബാറ്റിംഗ് കരുത്തും നിർണ്ണായക ഘട്ടങ്ങളിൽ വിക്കറ്റുകൾ വീഴ്ത്താനുള്ള ബൗളിംഗ് പാടവവുമാണ് ഹാർദിക്കിനെ വ്യത്യസ്തനാക്കുന്നത്.
വെസ്റ്റ് ഇൻഡീസ് ടി 20 ക്രിക്കറ്റ് ചരിത്രം കണ്ട ഏറ്റവും മികച്ച താരങ്ങളായ പൊള്ളാർഡ്, ബ്രാവോ, റസൽ തുടങ്ങിയവരും അഫ്ഗാൻ താരം മുഹമ്മദ് നബിയും ഒകെ ഭരിക്കുന്ന ലിസ്റ്റിലാണ് ഹാർദിക്കും ഇടംപിടിച്ചത്. ടീം ഇന്ത്യയുടെ ബാലൻസ് നിലനിർത്തുന്നതിൽ ഹാർദിക് വഹിക്കുന്ന പങ്ക് വളരെ വലുതാണ്. പരിക്കിന്റെ വെല്ലുവിളികളെ അതിജീവിച്ച് മൈതാനത്തേക്ക് തിരിച്ചെത്തിയ താരം, സൂപ്പർ 8 പോരാട്ടങ്ങൾ തുടങ്ങാനിരിക്കെ തന്റെ മികച്ച ഫോം തുടരുമെന്നാണ് ആരാധകർ പ്രതീക്ഷിക്കുന്നത്.
Discussion about this post