2026 ടി20 ലോകകപ്പിലെ നിർണ്ണായകമായ സൂപ്പർ-8 പോരാട്ടത്തിൽ ദക്ഷിണാഫ്രിക്കയെ നേരിടാൻ ഒരുങ്ങുന്ന ഇന്ത്യയ്ക്ക് ആത്മവിശ്വാസം പകർന്ന് ക്യാപ്റ്റൻ സൂര്യകുമാർ യാദവ്. തുടർച്ചയായി മൂന്ന് മത്സരങ്ങളിൽ പൂജ്യത്തിന് പുറത്തായ ഓപ്പണർ അഭിഷേക് ശർമ്മയെ മാറ്റണമെന്ന മുറവിളികൾക്കിടയിൽ, താരത്തിന് ശക്തമായ പിന്തുണയുമായി സൂര്യകുമാർ രംഗത്തെത്തി. സഞ്ജു സാംസൺ ആരാധകർക്ക് നിരാശ നൽകുന്നതാണ് ക്യാപ്റ്റന്റെ ഈ വാക്കുകൾ.
ശനിയാഴ്ച അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന പ്രീ-മാച്ച് പ്രസ് കോൺഫറൻസിലാണ് സൂര്യകുമാർ യാദവ് തന്റെ നയം വ്യക്തമാക്കിയത്. അഭിഷേകിന്റെ ഫോമില്ലായ്മയെക്കുറിച്ചുള്ള ചോദ്യങ്ങളോട് വളരെ രസകരവും എന്നാൽ കൃത്യവുമായ മറുപടിയാണ് അദ്ദേഹം നൽകിയത്.
അഭിഷേകിന്റെ ഫോമിൽ ആശങ്കപ്പെടുന്നവരെ പരിഹസിച്ചുകൊണ്ടാണ് സൂര്യകുമാർ സംസാരിച്ചത്. “അഭിഷേക് ശർമ്മയുടെ ഫോമിനെക്കുറിച്ച് ചിന്തിക്കുന്നവരെ കുറിച്ചോർത്താണ് എനിക്ക് ഇപ്പോൾ ആശങ്ക. അവനെ ഇനി നേരിടാൻ പോകുന്ന ടീമുകളെ കുറിച്ചോർത്ത് എനിക്ക് വലിയ സഹതാപമുണ്ട്. വർഷം മുഴുവൻ അവൻ നമുക്കായി റൺസ് നേടിത്തന്നു, ഇപ്പോൾ അവനെ പിന്തുണയ്ക്കേണ്ടത് നമ്മുടെ കടമയാണ്,” സൂര്യകുമാർ പറഞ്ഞു.
അഭിഷേകിനെ മാറ്റി സഞ്ജു സാംസണെ ഓപ്പണിംഗിൽ പരീക്ഷിക്കണമെന്ന ആരാധകരുടെ വലിയ ആവശ്യത്തിനാണ് ഇതോടെ വിരാമമായിരിക്കുന്നത്. ടീം മാനേജ്മെന്റ് ഇപ്പോഴും അഭിഷേകിന്റെ വെടിക്കെട്ട് ബാറ്റിംഗിൽ വിശ്വസിക്കുന്നുവെന്നും പരാജയങ്ങൾക്കിടയിലും താരം ടീമിൽ തുടരുമെന്നും ക്യാപ്റ്റൻ ഉറപ്പിച്ചു പറഞ്ഞു.
ഗ്രൂപ്പ് ഘട്ടത്തിലെ നാല് മത്സരങ്ങളും ജയിച്ച് വരുന്ന ഇന്ത്യ, നിലവിലെ ഫോമിൽ വലിയ മാറ്റങ്ങൾ വരുത്താൻ ആഗ്രഹിക്കുന്നില്ല. നാളെ ദക്ഷിണാഫ്രിക്കയ്ക്കെതിരായ മത്സരത്തിലും അഭിഷേക്-ഇഷാൻ സഖ്യം തന്നെയാകും ഇന്നിംഗ്സ് ഓപ്പൺ ചെയ്യുക.
Discussion about this post