ആഗോളതലത്തിൽ തരംഗമായ ‘ഫൗദ ‘ (Fauda) എന്ന ഇസ്രയേലി വെബ് സീരീസിലെ നായകനും സ്രഷ്ടാവുമായ ലിയോർ റാസ് പ്രധാനമന്ത്രി നരേന്ദ്ര മോദിക്കൊപ്പം. ഇസ്രയേൽ സന്ദർശനത്തിനിടെ ജെറൂസലേമിൽ വച്ചാണ് ലോകമെമ്പാടും ആരാധകരുള്ള ഈ പ്രിയതാരം പ്രധാനമന്ത്രിയെ കണ്ടുമുട്ടിയത്. മോദിക്കൊപ്പമുള്ള സെൽഫി തന്റെ ഔദ്യോഗിക ഫേസ്ബുക്ക് പേജിലൂടെ ലിയോർ റാസ് പങ്കുവെച്ചതോടെ നിമിഷങ്ങൾക്കകം അത് വൈറലായി മാറി. “ഭാഗ്യവശാൽ ഈ കൂടിക്കാഴ്ചയ്ക്ക് ഒരു സെൽഫി മാത്രമേ വേണ്ടിവന്നുള്ളൂ, അണ്ടർകവർ ഓപ്പറേഷനുകളൊന്നും ആവശ്യമായി വന്നില്ല” എന്ന രസകരമായ അടിക്കുറിപ്പോടെയാണ് താരം ചിത്രം പോസ്റ്റ് ചെയ്തത്. സീരീസിലെ തന്റെ കഥാപാത്രമായ ഡൊറോൺ കാവില്ലിയോയെ ഓർമ്മിപ്പിക്കുന്നതായിരുന്നു ലിയോർ റാസിന്റെ ഈ പരാമർശം.
നെറ്റ്ഫ്ലിക്സിലൂടെ ലോകമെമ്പാടും ആരാധകരെ സൃഷ്ടിച്ച ഫൗഡ എന്ന സീരീസ് ഇന്ത്യയിലും വൻ ഹിറ്റാണ്. ഇസ്രയേൽ പ്രതിരോധ സേനയിലെ അണ്ടർകവർ കമാൻഡോകളുടെ കഥ പറയുന്ന ഈ പരമ്പരയിലെ ലിയോർ റാസിന്റെ പ്രകടനം ഏറെ പ്രശംസിക്കപ്പെട്ടിട്ടുള്ളതാണ്. പ്രധാനമന്ത്രി നരേന്ദ്ര മോദിയും താനും ഫൗഡയുടെ ആരാധകനാണെന്ന് നേരത്തെ വ്യക്തമാക്കിയിട്ടുണ്ട്. ഇസ്രയേലിലെ ഇന്ത്യൻ പ്രവാസികളെ അഭിസംബോധന ചെയ്യുന്ന വേളയിലും മ്യൂസിയം സന്ദർശന വേളയിലും ഇത്തരം സാംസ്കാരിക കൈമാറ്റങ്ങളെക്കുറിച്ച് പ്രധാനമന്ത്രി സൂചിപ്പിച്ചിരുന്നു. നേരത്തെ ഇന്റർനാഷണൽ ഫിലിം ഫെസ്റ്റിവൽ ഓഫ് ഇന്ത്യയിൽ (IFFI) പങ്കെടുക്കാൻ ലിയോർ റാസ് ഗോവയിൽ എത്തിയപ്പോഴും വലിയ സ്വീകരണമാണ് ലഭിച്ചത്.
ഇന്ത്യയും ഇസ്രയേലും തമ്മിലുള്ള നയതന്ത്ര ബന്ധത്തിനപ്പുറം കലയും സിനിമയും എങ്ങനെ ഇരുരാജ്യങ്ങളെയും ഒന്നിപ്പിക്കുന്നു എന്നതിന്റെ തെളിവായി ഈ സെൽഫി മാറി. സാങ്കേതിക വിദ്യയിലും കൃഷിയിലും മാത്രമല്ല, വിനോദ മേഖലയിലും ഇന്ത്യയും ഇസ്രയേലും തമ്മിലുള്ള സഹകരണം വർദ്ധിച്ചുവരികയാണ്. ലിയോർ റാസിനെ കൂടാതെ ഇസ്രയേലിലെ മറ്റ് പ്രമുഖ ചലച്ചിത്ര പ്രവർത്തകരും പ്രധാനമന്ത്രിയുമായി കൂടിക്കാഴ്ച നടത്തി.
