വെസ്റ്റ് ഇൻഡീസിനെതിരായ ആവേശകരമായ വിജയത്തിന് ശേഷം സഞ്ജു സാംസൺ നടത്തിയ ആഘോഷപ്രകടനം ഇപ്പോൾ ചർച്ചയാവുകയാണ്. വിജയ റൺ കുറിച്ചതിന് പിന്നാലെ സഞ്ജു തന്റെ ഹെൽമെറ്റ് അഴിച്ച് മൈതാനത്തേക്ക് എറിഞ്ഞിരുന്നു. തുടർന്ന് മുട്ടുകുത്തി നിന്ന് ദൈവത്തിന് നന്ദി പറയുകയും ചെയ്തു. എന്നാൽ ഹെൽമെറ്റ് നിലത്തേക്ക് എറിഞ്ഞത് ഐസിസിയുടെ ‘അബ്യൂസ് ഓഫ് ക്രിക്കറ്റ് എക്യുപ്മെന്റ്’ എന്ന നിയമപ്രകാരം കുറ്റകരമാകാൻ സാധ്യതയുണ്ട്.
എന്താണ് ഐസിസി നിയമം?
ഐസിസി പെരുമാറ്റച്ചട്ടത്തിലെ ആർട്ടിക്കിൾ 2.2 പ്രകാരം, ബാറ്റ്, ഹെൽമെറ്റ്, സ്റ്റമ്പ് തുടങ്ങിയ കായിക ഉപകരണങ്ങളോട് മോശമായി പെരുമാറുന്നത് കുറ്റകരമാണ്. അത് ദേഷ്യം കൊണ്ടോ അതോ അമിതമായ ആഹ്ലാദം കൊണ്ടോ ആണെങ്കിലും നടപടി സ്വീകരിക്കാൻ മാച്ച് റെഫറിക്ക് അധികാരമുണ്ട്. ഫെബ്രുവരി 18-ന് നടന്ന മത്സരത്തിൽ ഹെൽമെറ്റ് എറിഞ്ഞതിന് സ്കോട്ട്ലൻഡ് താരം ജോർജ്ജ് മുൻസിക്ക് ഒരു ഡിമെറിറ്റ് പോയിന്റ് ശിക്ഷയായി ലഭിച്ചിരുന്നു.
സഞ്ജുവിന് വിലക്ക് ലഭിക്കുമോ?
സാധാരണഗതിയിൽ ഇത്തരത്തിലുള്ള സംഭവങ്ങൾ ‘ലെവൽ 1’ വിഭാഗത്തിലാണ് ഉൾപ്പെടാറുള്ളത്. ഇതിന് മാച്ച് ഫീയുടെ 50 ശതമാനം പിഴയും പരമാവധി രണ്ട് ഡിമെറിറ്റ് പോയിന്റുകളുമാണ് ശിക്ഷ ലഭിക്കാറുള്ളത്. അതിനാൽ തന്നെ ഒരു മത്സരത്തിൽ നിന്ന് വിലക്ക് ലഭിക്കാനുള്ള സാധ്യത വളരെ കുറവാണ്. 24 മാസത്തിനുള്ളിൽ 4 ഡിമെറിറ്റ് പോയിന്റുകൾ ലഭിച്ചാൽ മാത്രമേ വിലക്ക് വരാറുള്ളൂ. മുമ്പ് ഹർമൻപ്രീത് കൗറിന് രണ്ട് മത്സരങ്ങളിൽ വിലക്ക് ലഭിച്ചത് അമ്പയറുടെ തീരുമാനത്തെ പരസ്യമായി എതിർത്തതിനും ബാറ്റ് കൊണ്ട് സ്റ്റമ്പ് അടിച്ചു തകർത്തതിനും കൂടിയായിരുന്നു
മാർച്ച് 5-ന് മുംബൈ വാംഖഡെ സ്റ്റേഡിയത്തിൽ ഇംഗ്ലണ്ടിനെതിരായ സെമി ഫൈനൽ നടക്കാനിരിക്കെ സഞ്ജുവിനെതിരെ നടപടിയുണ്ടാകുമോ എന്ന ആശങ്കയിലാണ് ആരാധകർ. എന്നാൽ ആവേശത്തിന്റെ പുറത്ത് ചെയ്ത കാര്യമായതിനാൽ മാച്ച് റെഫറി സഞ്ജുവിനോട് വിട്ടുവീഴ്ച കാണിക്കുമെന്നാണ് കരുതപ്പെടുന്നത്.
