കേരള രാഷ്ട്രീയത്തിൽ വലിയ ചർച്ചകൾക്ക് വഴിതുറന്ന് പ്രമുഖ മേക്കപ്പ് ആർട്ടിസ്റ്റും സോഷ്യൽ മീഡിയ ഇൻഫ്ലുവൻസറുമായ സീമ വിനീത് ബിജെപിയിൽ ചേർന്നു. സീമ വിനീതിന് പുറമെ സംസ്ഥാനത്തെ വിവിധ ഭാഗങ്ങളിൽ നിന്നുള്ള 16 ട്രാൻസ്ജെൻഡർ വ്യക്തികളാണ് ബിജെപി അംഗത്വം സ്വീകരിച്ചത്. തിരുവനന്തപുരത്ത് നടന്ന ചടങ്ങിൽ ബിജെപി സംസ്ഥാന നേതൃത്വത്തിൽ നിന്ന് ഇവർ സ്വീകരണം ഏറ്റുവാങ്ങി. പ്രധാനമന്ത്രി നരേന്ദ്ര മോദിയുടെ നയങ്ങളിലും ഭാരതീയ ജനതാ പാർട്ടിയുടെ വികസന കാഴ്ചപ്പാടിലും ആകൃഷ്ടരായാണ് തങ്ങൾ പാർട്ടിയിൽ ചേരുന്നതെന്ന് സീമ വിനീത് ഉൾപ്പെടെയുള്ളവർ വ്യക്തമാക്കി.
ട്രാൻസ്ജെൻഡർ സമൂഹത്തിന്റെ ഉന്നമനത്തിനായി കേന്ദ്ര സർക്കാർ നടപ്പിലാക്കുന്ന വിവിധ ക്ഷേമപദ്ധതികളും നിയമനിർമ്മാണങ്ങളും തങ്ങളുടെ പാർട്ടി പ്രവേശനത്തിന് കാരണമായെന്ന് ഇവർ പ്രതികരിച്ചു. സമൂഹത്തിന്റെ മുഖ്യധാരയിലേക്ക് ട്രാൻസ്ജെൻഡർ വ്യക്തികളെ എത്തിക്കാനുള്ള ബിജെപിയുടെ ശ്രമങ്ങൾക്ക് വലിയ കരുത്തായിരിക്കും പുതിയ അംഗങ്ങളുടെ കടന്നുവരവ്. നേരത്തെ വിവിധ സാമൂഹിക വിഷയങ്ങളിൽ കൃത്യമായ നിലപാടുകൾ അറിയിച്ചിട്ടുള്ള സീമ വിനീത്, ബിജെപിയിൽ ചേരുന്നതോടെ സജീവ രാഷ്ട്രീയ പ്രവർത്തനങ്ങളിലേക്ക് ഇറങ്ങാനാണ് തീരുമാനിച്ചിരിക്കുന്നത്. ദേശീയതയിലും വികസനത്തിലും അധിഷ്ഠിതമായ രാഷ്ട്രീയത്തോടൊപ്പം നിൽക്കാനാണ് തങ്ങളുടെ തീരുമാനമെന്ന് ഈ കൂട്ടായ്മ അറിയിച്ചു.
കേരളത്തിലെ മാറുന്ന രാഷ്ട്രീയ സാഹചര്യത്തിൽ ട്രാൻസ്ജെൻഡർ സമൂഹം ബിജെപിയിലേക്ക് ആകൃഷ്ടരാകുന്നത് ഇടത്-വലത് മുന്നണികൾക്ക് വലിയ തിരിച്ചടിയായിട്ടാണ് രാഷ്ട്രീയ നിരീക്ഷകർ കാണുന്നത്. ട്രാൻസ്ജെൻഡർ വ്യക്തികളുടെ അവകാശങ്ങൾക്കായി ശബ്ദമുയർത്തുന്നതിനൊപ്പം ഭാരതത്തെ ഒരു ലോകശക്തിയാക്കി മാറ്റാനുള്ള ബിജെപിയുടെ നീക്കങ്ങൾക്ക് തങ്ങളും പങ്കാളികളാകുമെന്ന് സീമ വിനീത് വ്യക്തമാക്കി. വരും ദിവസങ്ങളിൽ കൂടുതൽ ആളുകൾ തങ്ങൾക്കൊപ്പം പാർട്ടിയിലേക്ക് എത്തുമെന്നും ഇവർ സൂചിപ്പിച്ചു.
