ജമ്മു കശ്മീർ മുൻ മുഖ്യമന്ത്രിയും നാഷണൽ കോൺഫറൻസ് അധ്യക്ഷനുമായ ഫറൂഖ് അബ്ദുള്ളയ്ക്ക് നേരെയുണ്ടായ വധശ്രമത്തിൽ ഞെട്ടിക്കുന്ന വെളിപ്പെടുത്തലുകളുമായി പ്രതി കമൽ സിംഗ് ജംവാൾ. ഫറൂഖ് അബ്ദുള്ളയെ വകവരുത്താൻ താൻ കഴിഞ്ഞ 20 വർഷമായി കാത്തിരിക്കുകയായിരുന്നുവെന്നും ഈ ലക്ഷ്യം നടപ്പിലാക്കിയതിൽ തനിക്ക് ലവലേശം ഖേദമില്ലെന്നും പ്രതി പോലീസിനോട് പറഞ്ഞു. വ്യക്തിപരമായ അജണ്ടയാണ് ആക്രമണത്തിന് പിന്നിലെന്നും ഇയാൾ അവകാശപ്പെട്ടു. ജമ്മുവിൽ ഒരു വിവാഹച്ചടങ്ങിൽ പങ്കെടുക്കുന്നതിനിടെയാണ് ഫറൂഖ് അബ്ദുള്ളയ്ക്ക് നേരെ പോയിന്റ് ബ്ലാങ്ക് റേഞ്ചിൽ നിന്ന് പ്രതി വെടിയുതിർത്തത്. എന്നാൽ ലക്ഷ്യം തെറ്റിയതും എൻഎസ്ജി (NSG) കമാൻഡോകളുടെ സമയോചിതമായ ഇടപെടലും കാരണം അദ്ദേഹം അത്ഭുതകരമായി രക്ഷപ്പെടുകയായിരുന്നു.
63-കാരനായ കമൽ സിംഗ് ജംവാൾ സിഡ്റ സ്വദേശിയാണ്. സെഡ് പ്ലസ് സുരക്ഷയുള്ള ഫറൂഖ് അബ്ദുള്ളയുടെ തൊട്ടടുത്തെത്തി തന്റെ ലൈസൻസുള്ള പിസ്റ്റൾ ഉപയോഗിച്ചാണ് ഇയാൾ നിറയൊഴിച്ചത്. വെടിയുണ്ട ലക്ഷ്യം തെറ്റിയതോടെ മിന്നൽവേഗത്തിൽ എൻഎസ്ജി കമാൻഡോകൾ ഇയാളെ കീഴ്പ്പെടുത്തുകയായിരുന്നു. ആക്രമണ സമയത്ത് ഇയാൾ മദ്യലഹരിയിലായിരുന്നുവെന്ന് പോലീസ് കണ്ടെത്തി. സ്ഥലത്തുണ്ടായിരുന്ന ജനക്കൂട്ടം പ്രതിയെ മർദ്ദിച്ച ശേഷമാണ് പോലീസിന് കൈമാറിയത്. ചോദ്യം ചെയ്യലിനിടെ കസേരയിൽ തികച്ചും ശാന്തനായി ഇരുന്നാണ് ഇയാൾ തന്റെ ക്രൂരമായ ആഗ്രഹം വെളിപ്പെടുത്തിയത്. ‘ജാഗരൺ മഞ്ച്’ എന്ന അത്ര അറിയപ്പെടാത്ത ഒരു സംഘടനയുടെ ചെയർമാനാണെന്നാണ് ഇയാൾ അവകാശപ്പെടുന്നത്. സ്വന്തമായുള്ള മൂന്ന് കടകളിൽ നിന്നുള്ള വാടക കൊണ്ടാണ് ഇയാൾ ജീവിക്കുന്നത്.
പ്രതിക്ക് ഏതെങ്കിലും ഭീകര സംഘടനകളുമായി ബന്ധമുണ്ടോ അതോ ഇയാൾ ഒറ്റയ്ക്ക് നടത്തിയ നീക്കമാണോ എന്ന് പോലീസ് വിശദമായി അന്വേഷിച്ചുവരികയാണ്. സെഡ് പ്ലസ് സുരക്ഷയുള്ള ഒരു നേതാവിനെതിരെ ഇത്രയും അടുത്തെത്തി ആക്രമണം നടത്താൻ കഴിഞ്ഞത് വലിയ സുരക്ഷാ വീഴ്ചയായാണ് വിലയിരുത്തപ്പെടുന്നത്. ജമ്മു കശ്മീരിലെ രാഷ്ട്രീയ നേതാക്കളുടെ സുരക്ഷ കൂടുതൽ കർശനമാക്കാൻ അധികൃതർ നിർദ്ദേശം നൽകി. ആക്രമണത്തിന് പിന്നിൽ വ്യക്തമായ ഗൂഢാലോചനയുണ്ടോ എന്നറിയാൻ ഇയാളുടെ മൊബൈൽ ഫോൺ രേഖകളും പോലീസ് പരിശോധിക്കുന്നുണ്ട്.
