ഗ്യാസ് സിലിണ്ടറുകളുടെ വിലവർധനവും ലഭ്യതക്കുറവും മൂലം ബുദ്ധിമുട്ടുന്ന വീട്ടമ്മമാർക്കും പ്രവാസികൾക്കും ഒരുപോലെ പ്രയോജനപ്പെടുന്ന ഇൻഡക്ഷൻ കുക്കറിനെ ഇന്ന് പ്രത്യേകം പരിചയപ്പെടുത്തേണ്ട സാഹചര്യം ഇല്ലല്ലോ. വൈദ്യുതി ഉപയോഗിച്ച് പ്രവർത്തിക്കുന്ന ഈ ഉപകരണം ഇന്ന് ഒട്ടുമിക്ക അടുക്കളകളിലെയും അവിഭാജ്യ ഘടകമായി മാറിക്കഴിഞ്ഞു.
ഗ്യാസിനെ അപേക്ഷിച്ച് വളരെ പെട്ടെന്ന് ഭക്ഷണം പാകം ചെയ്യാൻ സാധിക്കും എന്നത് ഇൻഡക്ഷൻ കുക്കറിന്റെ ഒരു ഗുണം തന്നെയാണ്. വൈദ്യുതി ചാർജ് അധികമാകുമെന്ന് പലരും ഭയപ്പെടുന്നുണ്ടെങ്കിലും, ശരിയായ രീതിയിൽ ഉപയോഗിച്ചാൽ ഗ്യാസിനേക്കാൾ ലാഭകരമാണ് ഇൻഡക്ഷൻ പാചകം എന്നതാണ് വസ്തുത. പുകയോ കരിയോ ഉണ്ടാകാത്തതിനാൽ അടുക്കള എപ്പോഴും വൃത്തിയായിരിക്കും എന്നതും ഇതിന്റെ ഗുണങ്ങളിൽ ഒന്നാണ്.
പ്രത്യേകം ശ്രദ്ധിക്കേണ്ട മറ്റൊരു കാര്യം ഇൻഡക്ഷൻ കുക്കറിൽ പാചകം ചെയ്യുമ്പോൾ എല്ലാ പാത്രങ്ങളും ഉപയോഗിക്കാൻ കഴിയില്ല. ഇതിനായി പ്രത്യേകമായ ഇൻഡക്ഷൻ ബേസ് (Induction Base) ഉള്ള പാത്രങ്ങൾ വേണം. സ്റ്റീൽ പാത്രങ്ങൾ, കാസ്റ്റ് അയൺ പാത്രങ്ങൾ എന്നിവ ഇതിൽ ഉപയോഗിക്കാം. അലുമിനിയം, ചെമ്പ്, മൺപാത്രങ്ങൾ എന്നിവ നേരിട്ട് ഉപയോഗിക്കാൻ സാധിക്കില്ല.
വൈദ്യുതി ലാഭിക്കാനായി പാചകം തുടങ്ങുന്നതിന് മുൻപ് തന്നെ ആവശ്യമായ സാധനങ്ങൾ അരിഞ്ഞും തയ്യാറാക്കിയും വെക്കുക, ശരിയായ അളവിലുള്ള പാത്രങ്ങൾ ഉപയോഗിക്കുക, പാചകം കഴിഞ്ഞാലുടൻ സ്വിച്ച് ഓഫ് ചെയ്യുക, തുടങ്ങിയ മാർഗങ്ങൾ ഉപയോഗിക്കാവുന്നതാണ്.
ഇന്ത്യൻ വിപണിയിലെ മുൻനിര ബ്രാൻഡുകളായ Prestige, Philips, Pigeon , തുടങ്ങിയ ബ്രാൻഡുകൾക്ക് എല്ലാം ഈ ബുത്തിമേറ്റേറിയ സമയത്ത് ആവശ്യക്കാർ ഏറെയാണ്. ഇനി നിങ്ങൾക്ക് സാധാരണ പാത്രങ്ങൾ (മൺപാത്രം, അലുമിനിയം) തന്നെ ഉപയോഗിക്കാൻ ആഗ്രഹിക്കുന്നുണ്ടെങ്കിൽ ഒരു ഇൻഫ്രാറെഡ് കുക്കർ വാങ്ങുന്നതാണ് നല്ലത്. ഇതും വൈദ്യുതിയിൽ പ്രവർത്തിക്കുന്നവയാണ്. എന്നാൽ ഇൻഡക്ഷൻ കുക്കറിൽ നിന്നും വ്യത്യസ്തമായി, ഇതിൽ ഏത് തരം പാത്രങ്ങളും ഉപയോഗിക്കാം എന്നതാണ് ഇതിന്റെ ഏറ്റവും വലിയ പ്രത്യേകത. അതല്ല, അതിവേഗ പാചകമാണ് ലക്ഷ്യമെങ്കിൽ ഇൻഡക്ഷൻ കുക്കർ തിരഞ്ഞെടുക്കാം.
