എന്തിനാണ് അധികം, ഇതുപോലെ ഒന്ന് പോരെ; ചെന്നൈ ആരാധകരെ ഇളക്കിമറിച്ച് ഒരു ചിത്രം; തിളങ്ങി ധോണിയും സഞ്ജുവും

ഇന്ത്യൻ പ്രീമിയർ ലീഗിലെ ഏറ്റവും വലിയ അട്ടിമറി നീക്കത്തിന് പിന്നാലെ, ചെന്നൈ സൂപ്പർ കിംഗ്‌സ് ആരാധകരെ ആവേശത്തിലാഴ്ത്തി സഞ്ജു സാംസണും എം.എസ്. ധോണിയും ഒന്നിച്ചുള്ള ദൃശ്യങ്ങൾ പുറത്ത്. ഐപിഎൽ 2026 സീസണിന് മുന്നോടിയായി ചെന്നൈ ചിദംബരം സ്റ്റേഡിയത്തിൽ നടന്ന പരിശീലന സെഷനിലാണ് ഇരുവരും ഒരുമിച്ച് സമയം ചിലവഴിച്ചത്. റിപ്പോർട്ടുകൾ പ്രകാരം സഞ്ജു ടീമിനൊപ്പം ചേർന്നത് ചെന്നൈ ക്യാമ്പിൽ വലിയ ഊർജ്ജമാണ് നൽകിയിരിക്കുന്നത്.

കഴിഞ്ഞ വർഷത്തെ മിനി ലേലത്തിന് മുന്നോടിയായി രാജസ്ഥാൻ റോയൽസിൽ നിന്നും 18 കോടി രൂപയ്ക്ക് ചെന്നൈ സൂപ്പർ കിംഗ്‌സിലെത്തിയ സഞ്ജു സാംസൺ മാർച്ച് 19-നാണ് ടീമിനൊപ്പം ചേർന്നത്. പരിശീലനത്തിനിടെ ഗ്രൗണ്ടിൽ വെച്ച് സഞ്ജുവും മുൻ നായകൻ എം.എസ്. ധോണിയും ഏറെ നേരം സംസാരിക്കുന്നത് ആരാധകർ ഏറ്റെടുത്തു കഴിഞ്ഞു. ടി20 ലോകകപ്പ് കിരീടം നിലനിർത്തുന്നതിൽ ഇന്ത്യയ്ക്കായി നിർണ്ണായക പങ്ക് വഹിച്ച സഞ്ജു, തന്റെ മൂന്നാമത്തെ ഐപിഎൽ ടീമിനായാണ് ഇക്കുറി പാഡ് കെട്ടുന്നത്.

ഐപിഎൽ ചരിത്രത്തിലെ തന്നെ ഏറ്റവും വലിയ ട്രേഡ് ഡീലുകളിലൊന്നിലൂടെയാണ് സഞ്ജു ചെന്നൈയിലെത്തിയത്. ചെന്നൈയുടെ വിശ്വസ്ത താരം രവീന്ദ്ര ജഡേജയെ രാജസ്ഥാൻ റോയൽസിന് നൽകിക്കൊണ്ടാണ് സഞ്ജുവിനെ സി.എസ്.കെ സ്വന്തമാക്കിയത്. ഡൽഹി ഡെയർഡെവിൾസ്, രാജസ്ഥാൻ റോയൽസ് എന്നീ ടീമുകൾക്ക് ശേഷം സഞ്ജുവിന്റെ കരിയറിലെ മൂന്നാമത്തെ ടീമാണ് ചെന്നൈ സൂപ്പർ കിംഗ്‌സ്. ശശി തരൂർ വിശേഷിപ്പിച്ചത് പോലെ ‘വിഴിഞ്ഞത്തിന്റെ ഏറ്റവും വലിയ കയറ്റുമതി’ ഇനി ചെന്നൈയുടെ ഭാഗധേയം നിർണ്ണയിക്കും.

തുടർച്ചയായ രണ്ട് സീസണുകളിൽ പ്ലേ ഓഫ് കാണാതെ പുറത്തായ ചെന്നൈയ്ക്ക് സഞ്ജുവിന്റെ വരവ് വലിയ ആശ്വാസമാണ്. 2026 ടി20 ലോകകപ്പിലെ ടൂർണമെന്റിലെ താരം കൂടിയായ സഞ്ജു 321 റൺസുമായി മികച്ച ഫോമിലാണ്. വരാനിരിക്കുന്ന സീസണിൽ ആറാം കിരീടം ലക്ഷ്യമിടുന്ന ചെന്നൈയ്ക്ക് സഞ്ജു-ധോണി സഖ്യം വലിയ പ്രതീക്ഷയാണ് നൽകുന്നത്.