വാഷിംഗ്ടൺ : നാറ്റോക്കെതിരെ കടുത്ത വിമർശനവുമായി യുഎസ് പ്രസിഡണ്ട് ഡൊണാൾഡ് ട്രംപ്. ഇറാനെതിരായ യുഎസ്-ഇസ്രായേൽ യുദ്ധത്തിന് പിന്തുണ നൽകാത്തതിന്റെ പേരിൽ നാറ്റോ സഖ്യകക്ഷികളെ ട്രംപ് കടുത്ത ഭാഷയിൽ വിമർശിച്ചു. നാറ്റോ വെറും ഭീരുക്കൾ ആണെന്നും യുഎസ് ഇല്ലെങ്കിൽ നാറ്റോ വെറും കടലാസ് പുലി മാത്രമാണെന്നും ട്രംപ് കുറ്റപ്പെടുത്തി.
ഹോർമുസ് കടലിടുക്കിലൂടെയുള്ള ഷിപ്പിംഗ് സുരക്ഷ ഉറപ്പാക്കാൻ സഹായിക്കുന്നതിന് നാറ്റോ കക്ഷികളുടെ സഹായം നേരത്തെ ട്രംപ് തേടിയിരുന്നു. എന്നാൽ ഇതിന് സഖ്യ രാജ്യങ്ങൾ തയ്യാറാകാതിരുന്നതോടെയാണ് ഇപ്പോൾ കടുത്ത ഭാഷയിലുള്ള വിമർശനവുമായി ട്രംപ് രംഗത്തെത്തിയിട്ടുള്ളത്. ഉയർന്ന എണ്ണ വിലയെ കുറിച്ച് പരാതിപ്പെടുന്നവർ യുദ്ധത്തിൽ പങ്കുചേരാൻ ആഗ്രഹിക്കുന്നില്ല എന്നും ട്രംപ് കുറ്റപ്പെടുത്തി. ഉയർന്ന എണ്ണവിലയ്ക്ക് ഒരേയൊരു കാരണം ഹോർമുസ് കടലിടുക്ക് ആണ്. അവിടെ ഒരു ചെറിയ സൈനിക നടപടിക്ക് പോലും എണ്ണ വിലയെ കുറിച്ച് പരാതിപ്പെടുന്ന രാജ്യങ്ങൾ തയ്യാറാവുന്നില്ല എന്നും ട്രംപ് വിമർശിച്ചു. ഭീരുക്കളെ ഞങ്ങൾ എന്നും ഓർക്കും എന്നും സമൂഹമാധ്യമങ്ങളിൽ പങ്കുവെച്ച ഒരു പോസ്റ്റിൽ ട്രംപ് വ്യക്തമാക്കി.
