കണ്ണൂർ: തിരഞ്ഞെടുപ്പ് ചൂടിൽ തിളയ്ക്കുന്ന കേരളത്തിൽ രാഷ്ട്രീയ എതിരാളികൾക്കും പാർട്ടി വിട്ടുപോയവർക്കും നേരെ കടുത്ത ഭാഷയിൽ ആഞ്ഞടിച്ച് മുഖ്യമന്ത്രി പിണറായി വിജയൻ. സിപിഎം വിട്ടുപോയവർ കാട്ടിയത് പച്ചയായ വർഗ്ഗവഞ്ചനയാണെന്നും അത്തരക്കാർ ജനങ്ങൾക്കിടയിൽ ഒറ്റപ്പെടുമെന്നും അദ്ദേഹം മുന്നറിയിപ്പ് നൽകി. കണ്ണൂരിൽ പാർട്ടി വിട്ട ടി.കെ. ഗോവിന്ദന്റെ ആരോപണങ്ങളെ തള്ളിക്കളഞ്ഞ മുഖ്യമന്ത്രി, പാർട്ടിയിൽ യാതൊരുവിധ ആഭ്യന്തര പ്രശ്നങ്ങളുമില്ലെന്ന് വ്യക്തമാക്കി. സംസ്ഥാന കമ്മിറ്റിയെടുത്ത തീരുമാനങ്ങളിൽ തന്റെ അംഗീകാരമില്ലായിരുന്നു എന്ന വാദം ശുദ്ധ അസംബന്ധമാണെന്നും അദ്ദേഹം പറഞ്ഞു.
ബാർ ലൈസൻസുമായി ബന്ധപ്പെട്ട അഴിമതി ആരോപണങ്ങൾ ഉന്നയിക്കുന്ന കോൺഗ്രസ് നേതാവ് കെ.സി. വേണുഗോപാലിന്റെ സംസ്കാരമാണ് ഇതിലൂടെ വെളിവാകുന്നതെന്ന് മുഖ്യമന്ത്രി പരിഹസിച്ചു. ഹരിയാനയിൽ സീറ്റ് കുംഭകോണ ആരോപണം നേരിടുന്നയാളാണ് കേരളത്തിലെ അഴിമതിയില്ലാത്ത സർക്കാരിനെതിരെ വിരൽ ചൂണ്ടുന്നത്. എൽഡിഎഫ് ഭരണത്തിന് കീഴിൽ അഴിമതിമുക്ത സംസ്ഥാനമായി കേരളം മാറിയത് ജനങ്ങൾക്കറിയാം. തിരഞ്ഞെടുപ്പ് കഴിയുമ്പോൾ ആർക്കാണ് കപട ആത്മവിശ്വാസം എന്ന് വ്യക്തമാകുമെന്നും അദ്ദേഹം കൂട്ടിച്ചേർത്തു
