ന്യൂഡൽഹി : ഡൽഹിയിലെ അക്ബർ റോഡിലെയും റെയ്സിന റോഡിലെയും പാർട്ടി ഓഫീസുകൾ മാർച്ച് 28 നകം ഒഴിയണമെന്ന് ആവശ്യപ്പെട്ട് കോൺഗ്രസിന് നോട്ടീസ്. നിലവിൽ പ്രവർത്തനമില്ലാത്ത 24 അക്ബർ റോഡിലെ എഐസിസി ആസ്ഥാനവും 5 റെയ്സിന റോഡിലെ യൂത്ത് കോൺഗ്രസ് ഓഫീസും ഒഴിഞ്ഞു കൊടുക്കണം എന്നാണ് ആവശ്യം. ഐടിഒയ്ക്ക് സമീപമുള്ള ഇന്ദിരാ ഭവനിലെ പുതിയ ആസ്ഥാനത്തേക്ക് പാർട്ടി പ്രവർത്തനങ്ങൾ ഇതിനകം മാറ്റിയെങ്കിലും, പ്രതീകാത്മകവും രാഷ്ട്രീയവുമായ പ്രാധാന്യം കാരണം അക്ബർ റോഡ് ഒഴിയാതിരിക്കുന്ന സാഹചര്യത്തിലാണ് കേന്ദ്ര എസ്റ്റേറ്റ് വകുപ്പ് കർശന നിർദ്ദേശം നൽകിയിരിക്കുന്നത്.
രാഷ്ട്രീയ പാർട്ടികൾക്ക് സ്വന്തമായി ഓഫീസ് നിർമ്മിക്കാൻ ഭൂമി അനുവദിച്ചു കഴിഞ്ഞാൽ, പഴയ സർക്കാർ ബംഗ്ലാവുകൾ നിശ്ചിത സമയത്തിനകം തിരികെ നൽകണമെന്ന നിയമമനുസരിച്ചാണ് കേന്ദ്രസർക്കാർ കോൺഗ്രസിനോട് പഴയ ഓഫീസ് കെട്ടിടങ്ങൾ ഒഴിയാൻ ആവശ്യപ്പെട്ടിട്ടുള്ളത്. കോട്ട്ല മാർഗിൽ കോൺഗ്രസിന് അനുവദിച്ച ഭൂമിയിൽ നിലവിൽ ‘ഇന്ദിരാ ഭവൻ’ എന്ന പേരിൽ ഓഫീസ് പ്രവർത്തനം നടത്തുന്നുണ്ട്. എന്നാൽ ഏകദേശം 48 വർഷത്തോളം തങ്ങൾ പ്രവർത്തിച്ച പഴയ ഓഫീസ് എന്ന വൈകാരിക നിലപാട് ചൂണ്ടിക്കാട്ടിയാണ് കോൺഗ്രസ് പഴയ ഓഫീസ് കെട്ടിടങ്ങൾ ഒഴിഞ്ഞു കൊടുക്കാത്തത്.
