ഫ്ലൈദുബായ് വിമാനം ഇസ്രായേലിലെ ജനവാസ മേഖലയിലോ ബെൻ ഗൂറിയൻ വിമാനത്താവളത്തിലോ ഇടിച്ചിറക്കാൻ പദ്ധതിയിട്ടതായി പിടിയിലായ ഒമാനി കോ-പൈലറ്റ് ഹമാം അൽ ഹമ്മാമി ചോദ്യം ചെയ്യലിൽ സമ്മതിച്ചു. ഗാസയിലെ ജനങ്ങൾ നേരിടുന്ന ദുരിതങ്ങൾക്ക് പ്രതികാരം ചെയ്യാനും രക്തസാക്ഷിത്വം വരിക്കാനും വേണ്ടിയാണ് താൻ ഈ കൃത്യത്തിന് തുനിഞ്ഞതെന്ന് യുഎഇയിലെ അന്വേഷണ ഉദ്യോഗസ്ഥരോട് ഇയാൾ വെളിപ്പെടുത്തി. മുൻപ് ഒമാൻ എയറിൽ ജോലി ചെയ്തിരുന്ന ഇയാളെ തീവ്രവാദ നിലപാടുകളുടെ പേരിൽ അവിടെനിന്ന് ഒഴിവാക്കിയിരുന്നു. തുടർന്ന് എട്ടു മാസം മുൻപാണ് ഇയാൾ ഫ്ലൈദുബായിൽ ജോലിയിൽ പ്രവേശിച്ചത്. എയർലൈനിൽ ചേരുന്നതിന് മുൻപ് തന്നെ ഇസ്രായേൽ ലക്ഷ്യമാക്കി ആക്രമണം നടത്താൻ ഇയാൾ തിരുമാനിച്ചിരുന്നതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.
ദുബായിൽ നിന്ന് ഇസ്രായേലിലെ ടെൽ അവീവിലേക്ക് പറന്ന വിമാനം ജോർദാന്റെ വ്യോമാതിർത്തിക്ക് മുകളിലൂടെ സഞ്ചരിക്കുമ്പോൾ പ്രാർത്ഥിക്കാനെന്ന വ്യാജേന എഴുന്നേറ്റ അൽ ഹമ്മാമി, മുഖ്യ പൈലറ്റായ സ്മിത് മച്ചാറിനെ ആക്രമിക്കുകയായിരുന്നു. ഇയാൾ ഓട്ടോപൈലറ്റ് സംവിധാനം വിച്ഛേദിച്ച് വിമാനം കുത്തനെ താഴേക്ക് പതിപ്പിക്കാൻ ശ്രമിച്ചു. എന്നാൽ പരിക്കേറ്റ ക്യാപ്റ്റൻ സമയോചിതമായി കോക്ക്പിറ്റിന്റെ വാതിൽ തുറന്ന് യാത്രക്കാരുടെ സഹായം തേടുകയായിരുന്നു. സംഭവം നടന്നയുടൻ തന്നെ ഇസ്രായേലിന്റെ സുരക്ഷാ ഏജൻസിയായ ഷിൻ ബെറ്റും അന്വേഷണത്തിൽ പങ്കാളികളായി. ഈ ആക്രമണ ശ്രമം നടന്നതോടെ വിദേശ എയർലൈനുകളിലെ പൈലറ്റുമാരുടെ പശ്ചാത്തലവും മാനസികാരോഗ്യവും കർശനമായി പരിശോധിക്കാൻ അന്താരാഷ്ട്ര വ്യോമയാന സംഘടനകൾ തീരുമാനിച്ചിട്ടുണ്ട്.
ഫ്ലൈദുബായ് ഉൾപ്പെടെയുള്ള പ്രമുഖ വിമാനക്കമ്പനികൾ തങ്ങളുടെ പൈലറ്റുമാരുടെ മാനസികാരോഗ്യ പരിശോധനയും പശ്ചാത്തല പരിശോധനയും ശക്തമാക്കിയിട്ടുണ്ട്. സുരക്ഷാ വീഴ്ചകളെക്കുറിച്ച് സമഗ്രമായ അന്വേഷണം തുടരുകയാണെന്ന് എയർലൈൻ അധികൃതരും സുരക്ഷാ ഏജൻസികളും അറിയിച്ചു. ഇത്തരത്തിലുള്ള തീവ്രവാദ നീക്കങ്ങൾ വ്യോമയാന രംഗത്ത് വരുത്തുന്ന ഭീഷണികൾ നേരിടാൻ കർശന നടപടികൾ സ്വീകരിക്കാൻ അന്താരാഷ്ട്ര വ്യോമയാന സംഘടനകൾ തീരുമാനിച്ചു.
