ഇസ്ലാമാബാദ് : പാകിസ്താനിൽ പോലീസ് സ്റ്റേഷന് നേരെ ചാവേർ കാർ ബോംബ് ആക്രമണം. ഖൈബർ പഖ്തുൺഖ്വ പ്രവിശ്യയിലുണ്ടായ ചാവേർ കാർ ബോംബ് സ്ഫോടനത്തിൽ അഞ്ച് പേർ കൊല്ലപ്പെട്ടു. വ്യാഴാഴ്ച രാത്രി വൈകി ബാനു ജില്ലയിലെ ഡോമൽ തെഹ്സിലിലുള്ള പോലീസ് സ്റ്റേഷന് നേരെയാണ് ആക്രമണമുണ്ടായത്. സ്ഫോടകവസ്തുക്കൾ നിറച്ച കാർ പോലീസ് സ്റ്റേഷനിലേക്ക് ഇടിച്ചുകയറ്റിയാണ് ചാവേർ സ്ഫോടനം നടത്തിയത്.
നാല് പോലീസ് ഉദ്യോഗസ്ഥർക്ക് സ്ഫോടനത്തിൽ ഗുരുതരമായി പരിക്കേറ്റിട്ടുണ്ട്. മേഖലയിൽ നിരോധിത സംഘടനയായ തെഹ്രീക് ഇ താലിബാൻ പാകിസ്ഥാൻ പോലുള്ള ഗ്രൂപ്പുകൾ പാകിസ്താന്റെ സുരക്ഷാ സേനകളെ ലക്ഷ്യമിട്ട് നിരന്തരം ആക്രമണങ്ങൾ നടത്തുന്നുണ്ട്. ഈ വർഷം ഫെബ്രുവരിയിലും സമാനമായ രീതിയിൽ ബാജൗർ ജില്ലയിൽ നടന്ന ആക്രമണത്തിൽ 11 പോലീസുകാർ കൊല്ലപ്പെട്ടിരുന്നു.
