കർണാടകയിലെ കുടക് മലനിരകളിൽ ട്രെക്കിംഗിനിടെ കാണാതായ കോഴിക്കോട് നാദാപുരം സ്വദേശിനി ശരണ്യയെ (36) നാല് ദിവസത്തെ ആശങ്കകൾക്കൊടുവിൽ കണ്ടെത്തുമ്പോൾ അത് വെറുമൊരു രക്ഷപ്പെടുത്തലല്ല, മറിച്ച് അസാമാന്യമായ മനോധൈര്യത്തിന്റെ കഥ കൂടിയാവുകയാണ്. ഈ മാസം രണ്ടാം തീയതിയാണ് ഐടി പ്രൊഫഷണലായ ശരണ്യ 15 അംഗ സംഘത്തോടൊപ്പം കർണാടകയിലെ ഏറ്റവും ഉയർന്ന കൊടുമുടികളിലൊന്നായ തടിയൻമോൾ കീഴടക്കാൻ എത്തിയത്. എന്നാൽ തിരിച്ചിറങ്ങുന്നതിനിടെ വഴിതെറ്റി വനത്തിനുള്ളിൽ ഒറ്റപ്പെടുകയായിരുന്നു. കയ്യിലുണ്ടായിരുന്നതാകട്ടെ വെറും 500 മില്ലി ലിറ്റർ വെള്ളം മാത്രം. മൊബൈൽ റേഞ്ച് ഇല്ലാതിരുന്നതും ഫോൺ ചാർജ് തീർന്നതും പ്രതിസന്ധി ഇരട്ടിപ്പിച്ചു.
കാടിനുള്ളിൽ ആനയടക്കമുള്ള വന്യമൃഗങ്ങളുടെ സാന്നിധ്യമുള്ള മേഖലയിൽ ഭയത്തിന് കീഴടങ്ങാതെ ശരണ്യ പ്രകടിപ്പിച്ച ധീരത രക്ഷാപ്രവർത്തകരെപ്പോലും അത്ഭുതപ്പെടുത്തി. ആദ്യ രാത്രി ഒരു നീരൊഴുക്കിന് സമീപം ചിലവഴിച്ച ശരണ്യ പിന്നീട് ഓരോ ദിവസവും രക്ഷാപ്രവർത്തകർക്കായി കാത്തിരുന്നു. തന്നെ തിരഞ്ഞ് ഡ്രോണുകൾ വരുമെന്ന് ഉറച്ച വിശ്വാസമുണ്ടായിരുന്നതിനാൽ വനത്തിനുള്ളിലെ തുറസായ സ്ഥലങ്ങൾ നോക്കിയാണ് പിന്നീട് നീങ്ങിയത്. മഴയും തണുപ്പും വകവെക്കാതെ നാല് ദിവസമാണ് ശരണ്യ കാട്ടിൽ കഴിഞ്ഞത്. വൈകുന്നേരങ്ങളിൽ കാട് പ്രകാശിക്കുന്ന കാഴ്ചകൾ മനോഹരമായിരുന്നുവെന്നും തനിക്ക് ഒട്ടും ഭയം തോന്നിയിരുന്നില്ലെന്നുമാണ് രക്ഷപ്പെട്ട ശേഷം ശരണ്യ മാധ്യമങ്ങളോട് പറഞ്ഞത്.
വനത്തെക്കുറിച്ച് ആഴത്തിലുള്ള അറിവുള്ള പ്രാദേശിക ഗോത്രവിഭാഗമായ കുഡാ വിഭാഗത്തിൽപ്പെട്ടവരാണ് ശരണ്യയെ കണ്ടെത്തിയത്. കാടിന്റെ ഉൾഭാഗത്തുനിന്നും കേട്ട അസ്വാഭാവികമായ ശബ്ദം പിന്തുടർന്നെത്തിയ ഇവർ ഒരു കുന്നിൻ ചെരിവിൽ ഇരിക്കുകയായിരുന്ന ശരണ്യയെ കണ്ടെത്തുകയായിരുന്നു. കേരള മുഖ്യമന്ത്രി പിണറായി വിജയൻ കർണാടക മുഖ്യമന്ത്രി സിദ്ധരാമയ്യയുമായി ബന്ധപ്പെട്ടതിനെത്തുടർന്ന് തിരച്ചിൽ ഊർജിതമാക്കിയിരുന്നു. ആന്റി നക്സൽ ഫോഴ്സ്, വനം വകുപ്പ്, പോലീസ് എന്നിവരടങ്ങുന്ന ഒമ്പത് സംഘങ്ങളാണ് കഴിഞ്ഞ ദിവസങ്ങളിൽ കാട് അരിച്ചുപെറുക്കിയത്. ശരണ്യയുടെ മനോധൈര്യത്തെ കർണാടക വനംമന്ത്രി ഈശ്വർ ഖണ്ഡ്രെ അഭിനന്ദിച്ചു. ഞായറാഴ്ച രാത്രി നാദാപുരത്തെ വീട്ടിലെത്തിയ ശരണ്യയെ വികാരാധീനരായാണ് ബന്ധുക്കൾ സ്വീകരിച്ചത്. അടുത്ത ട്രെക്കിംഗ് എപ്പോഴാണെന്ന ചോദ്യത്തിന് “അടുത്ത വേനൽക്കാലത്ത് നോക്കാം” എന്ന ആത്മവിശ്വാസം നിറഞ്ഞ മറുപടിയാണ് ശരണ്യ നൽകിയത്.
