ഐപിഎൽ 2026-ൽ രാജസ്ഥാൻ റോയൽസിന്റെ 15 വയസ്സുകാരൻ വൈഭവ് സൂര്യവംശി എന്ന കൗമാര പ്രതിഭയുടെ തേരോട്ടം തുടരുന്നു. റോയൽ ചലഞ്ചേഴ്സ് ബെംഗളൂരുവിനെതിരായ മത്സരത്തിൽ വെറും 26 പന്തിൽ 78 റൺസുമായി ആർസിബിയെ തകർത്തെറിഞ്ഞ വൈഭവിന്റെ പ്രകടനം കണ്ട് സാക്ഷാൽ വിരാട് കോഹ്ലി പോലും അത്ഭുതപ്പെട്ടു. മത്സരശേഷം വിരാട് കോഹ്ലി വൈഭവിനെ നേരിട്ട് കണ്ട് അഭിനന്ദിക്കുകയും താരത്തിന് ഒരു പ്രത്യേക സമ്മാനം നൽകുകയും ചെയ്തത് ഇപ്പോൾ സോഷ്യൽ മീഡിയയിൽ തരംഗമാവുകയാണ്.
മത്സരത്തിന് പിന്നാലെ വൈഭവ് സൂര്യവംശിക്ക് തന്റെ രാജസ്ഥാൻ റോയൽസ് ക്യാപ്പിൽ വിരാട് കോഹ്ലി ഓട്ടോഗ്രാഫ് നൽകി. വെറുമൊരു ഒപ്പ് മാത്രമല്ല, “പ്രിയപ്പെട്ട വൈഭവ്, മിടുക്കൻ (Dear Vaibhav, well done)” എന്നൊരു കുറിപ്പും കോഹ്ലി ക്യാപ്പിൽ എഴുതി നൽകി. ഒരു ഇതിഹാസ താരം തന്റെ പ്രകടനം കണ്ട് നൽകിയ ഈ അംഗീകാരം വൈഭവിനെ സംബന്ധിച്ചിടത്തോളം വലിയൊരു നേട്ടമായി മാറി.
203 റൺസ് എന്ന കൂറ്റൻ ലക്ഷ്യം പിന്തുടർന്ന രാജസ്ഥാന് വേണ്ടി വൈഭവ് വെടിക്കെട്ട് പ്രകടനമാണ് നടത്തിയത്. 8 ഫോറുകളും 7 സിക്സറുകളും പറത്തിയ വൈഭവ്, ബെംഗളൂരു ബൗളർമാരെ അടിച്ച് തകർത്തു. വൈഭവിനൊപ്പം ധ്രുവ് ജുറൽ (81*) കൂടി തിളങ്ങിയതോടെ രാജസ്ഥാൻ ആറ് വിക്കറ്റ് ജയം സ്വന്തമാക്കി. ഈ ഇന്നിംഗ്സോടെ ടൂർണമെന്റിലെ റൺ വേട്ടക്കാരിൽ ഒന്നാമതെത്തിയ വൈഭവ് ഓറഞ്ച് ക്യാപ്പും സ്വന്തമാക്കി.
വൈഭവിനെക്കുറിച്ച് രാജസ്ഥാൻ നായകൻ റിയാൻ പരാഗിന് പറയാനുള്ളത് ഇങ്ങനെയാണ്: “എല്ലാവർക്കും അവനെ ഒരുപാട് ഇഷ്ടമാണ്. അവൻ ഒരു 15 വയസ്സുകാരൻ കുട്ടിയാണ്. ഭക്ഷണം കഴിക്കാനും കറങ്ങി നടക്കാനും ഒക്കെ അവന് വലിയ ഇഷ്ടമാണ്. അവൻ ഇതുപോലെ ബാറ്റിംഗിൽ തിളങ്ങുന്നുണ്ടെങ്കിൽ അവന് ഇഷ്ടമുള്ളതൊക്കെ ഞങ്ങൾ നൽകും.” നായകൻ പറഞ്ഞു.
A job well done with a long road ahead! 💗 pic.twitter.com/tymVTrdeqK
— Rajasthan Royals (@rajasthanroyals) April 11, 2026
