ഇന്ത്യൻ സിനിമയിൽ സമാനതകളില്ലാത്ത വിജയഗാഥ രചിച്ച് മുന്നേറുന്ന ‘ധുരന്ധർ: ദി റിവഞ്ച്’ എന്ന ചിത്രത്തിന്റെ ആവേശത്തിനിടെ നാഗ്പുരിലെ ആർഎസ്എസ് ആസ്ഥാനത്തെത്തി സർസംഘചാലക് മോഹൻ ഭാഗവതിനെ കണ്ട് ബോളിവുഡ് താരം രൺവീർ സിങ്. ബോക്സ് ഓഫീസിൽ 1600 കോടി രൂപയിലേറെ വാരിക്കൂട്ടി ചരിത്രം കുറിച്ച ചിത്രത്തിന്റെ വലിയ വിജയത്തിന് പിന്നാലെയാണ് താരം ആർഎസ്എസ് മേധാവിയുമായി കൂടിക്കാഴ്ച നടത്തിയത്. ഇന്ത്യൻ സംസ്കാരത്തെയും മൂല്യങ്ങളെയും ഉയർത്തിപ്പിടിക്കുന്ന ചിത്രത്തിന് ലഭിക്കുന്ന അഭൂതപൂർവ്വമായ പിന്തുണയിൽ സന്തോഷം പങ്കുവെക്കാനാണ് രൺവീർ എത്തിയതെന്നാണ് റിപ്പോർട്ടുകൾ.
ദേശീയതയ്ക്കും ധീരതയ്ക്കും പ്രാധാന്യം നൽകുന്ന ‘ധുരന്ധർ 2’ പ്രേക്ഷകർ ഇരുകൈയ്യും നീട്ടിയാണ് സ്വീകരിച്ചത്. ചിത്രത്തിനെതിരെ ചില കോണുകളിൽ നിന്നും വിമർശനങ്ങൾ ഉയരുന്നുണ്ടെങ്കിലും, അത്തരം വിവാദങ്ങളെ അപ്രസക്തമാക്കുന്ന രീതിയിലുള്ള ജനപിന്തുണയാണ് ചിത്രത്തിന് ലഭിക്കുന്നത്. നാഗ്പുരിലെത്തിയ രൺവീർ സിങ്ങിന് ആർഎസ്എസ് ആസ്ഥാനത്ത് ഊഷ്മളമായ സ്വീകരണമാണ് ലഭിച്ചത്. മോഹൻ ഭാഗവതിനൊപ്പമുള്ള താരത്തിന്റെ ചിത്രങ്ങൾ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു.
