വോർസസ്സ്റ്റർ: OHM UK (Organisation of Hindu Malayalees UK)യുടെ ആഭിമുഖ്യത്തിൽ 2026 ജൂലൈ 11-ന് വോർസസ്സ്റ്ററിലെ Tudor Grange Academy യിൽ സംഘടിപ്പിക്കുന്ന “രാമായണോത്സവം 2026” ൻറെ പോസ്റ്റർ പ്രകാശനം ചിദാനന്ദപുരി സ്വാമികൾ നിർവഹിച്ചു. പോസ്റ്റർ പ്രകാശനം നിർവ്വഹിച്ച് നൽകിയ അനുഗ്രഹ സന്ദേശത്തിൽ പരിപാടിയ്ക്ക് എല്ലാവിധ മംഗളാശംസകളും സ്വാമിജി അറിയിച്ചു. യുകെയിലെ വിവിധ ഹിന്ദു സമാജങ്ങളെ ഒരുമിപ്പിക്കുന്നതിനും, കുട്ടികളിലും യുവജനങ്ങളിലും ആത്മീയ മൂല്യങ്ങളും സാംസ്കാരിക പൈതൃകവും വളർത്തുന്നതിനും ലക്ഷ്യമിട്ടുള്ളതാണ് ഉത്സവം സംഘടിപ്പിക്കുന്നത്.
2016 മുതൽ യുകെയിലെ ഹിന്ദു സമൂഹത്തിനിടയിൽ ആത്മീയ, സാംസ്ക്കാരിക, സാമൂഹിക മേഖലകളിൽ പ്രവർത്തിച്ചു വരുന്ന സംഘടനയായ ഓം യുകെ കുട്ടികൾക്കായുള്ള ബാലഭാരതി, അദ്ധ്യാത്മിക സമിതി, വ്യക്തികൾക്കും കുടുംബങ്ങൾക്കും മാനസിക , ആശയ പിന്തുണ നൽകുന്നതിനായുള്ള ചിദഗ്നി എന്നീ വിവിധ വിഭാഗങ്ങളിലായി അതിൻറെ പ്രവർത്തനം വ്യാപിപ്പിച്ചിട്ടുണ്ട്.
യുകെയിലെ വിവിധ ഹിന്ദു സമാജങ്ങളെ ഏകോപിച്ചുകൊണ്ട് നടത്തുന്ന രാമായണോത്സവം ഓം യുകെയുടെ മറ്റൊരു പുതിയ ചുവടുവെയ്കാണ്. കുടുംബ സൌഹൃദമായ ഒരു ഏകദിന ഉത്സവമായാണ് ‘രാമായണോത്സവം’ ആഘോഷിക്കുക. ആഘോഷത്തിൻറെ ഭാഗമായി കലാ കായിക മത്സരങ്ങളും സംഘടിപ്പിക്കുന്നുണ്ട്. പ്രായഭേദമന്യേ എല്ലാവർക്കും പരിപാടിയിൽ പങ്കെടുക്കാവുന്നതാണെന്ന് ഓം യുകെ സംഘാടകർ അറിയിക്കുന്നു. ഗ്രൂപടിസ്ഥാനത്തിലും മത്സരങ്ങൾ ഉണ്ടായിരിക്കും.
കവിതാരചന, കഥാരചന, ലേഖനം എന്നിവയോടൊപ്പം, രാമായണ പ്രശ്നോത്തരി, രാമായണ പരായണം , ഭഗവദ്ഗീത ശ്ലോകമത്സരം, നൃത്തം , ചെണ്ടമേളം , തിരുവാതിരക്കളി , ഭജൻ, നാടകാവിഷ്കാരം, എന്നിവയാണ് പ്രധാന മത്സര ഇനങ്ങൾ. മത്സരാർത്ഥികൾക്ക് അവരുടെ ഹിന്ദു സമാജങ്ങൾ മുഖേന നേരത്തെ തന്നെ പേര് രജിസ്റ്റർ ചെയ്യാവുന്നതാണ്. മത്സരങ്ങളിൽ കൂടുതൽ പോയിൻറ് നേടുന്ന സമാജങ്ങൾക്ക് ഓവറോൾ ചാമ്പ്യൻഷിപ്പ് ട്രോഫിയും നൽകുന്നതാണ്.
കൂടുതൽ വിവരങ്ങൾക്കായി PH: 07774864598, ohmukkerala@gmail.com
