ചെന്നൈ സൂപ്പർ കിംഗ്‌സിന്റെ ഇതിഹാസ താരം എം.എസ്. ധോണി ഈ സീസണിൽ എന്ന് കളിക്കളത്തിലേക്ക് മടങ്ങിയെത്തുമെന്നത് ഒരു ‘മില്യൺ ഡോളർ’ ചോദ്യമായി തുടരുകയാണെന്ന് മുൻ താരം ബദ്രിനാഥ്. കൊൽക്കത്ത നൈറ്റ് റൈഡേഴ്‌സിനെതിരെയുള്ള അടുത്ത മത്സരത്തിൽ ധോണി കളിക്കുമോ എന്ന കാര്യത്തിൽ ടീം മാനേജ്‌മെന്റിന് പോലും കൃത്യമായ ധാരണയില്ലെന്ന് ബദ്രിനാഥ് വെളിപ്പെടുത്തി. “ധോണി ബാറ്റിംഗ് പരിശീലനം തുടങ്ങിയിട്ടുണ്ട്. ഓരോ ദിവസവും അദ്ദേഹത്തിന്റെ ശാരീരികക്ഷമത വിലയിരുത്തുന്നുണ്ട്. ശ്രദ്ധ മുഴുവൻ തന്നിലേക്ക് വരാതിരിക്കാനാണ് ധോണി ഇപ്പോൾ സ്റ്റേഡിയത്തിലേക്ക് വരാത്തത്,” ബദ്രിനാഥ് പറഞ്ഞു.
ധോണി തിരിച്ചെത്തിയാൽ ടീമിൽ നിന്ന് ആര് പുറത്തുപോകും എന്ന ചോദ്യത്തിന് ബദ്രിനാഥ് നൽകുന്ന ഉത്തരം സർഫറാസ് ഖാൻ എന്നാണ്. 202-ലധികം സ്ട്രൈക്ക് റേറ്റിൽ മികച്ച ഫോമിൽ കളിക്കുന്ന സർഫറാസിനെ മാറ്റേണ്ടി വരുന്നത് ടീമിന് വലിയ വെല്ലുവിളിയാകും. ധോണി വന്നാൽ അദ്ദേഹം വിക്കറ്റ് കീപ്പറാകുകയും സഞ്ജു സാംസൺ ഒരു ഫീൽഡറായി മാറുകയും ചെയ്യുമെന്നും ബദ്രിനാഥ് നിരീക്ഷിച്ചു.
ഡൽഹിക്കെതിരായ മത്സരത്തിൽ 18 പന്തിൽ 15 റൺസ് മാത്രം നേടിയ നായകൻ ഋതുരാജ് ഗെയ്‌ക്‌വാദിന്റെ മെല്ലെപ്പോക്കിനെ ബദ്രിനാഥ് വിമർശിച്ചു. മറ്റ് ടീമുകൾ പവർപ്ലേയിൽ അടിച്ചുതകർക്കുമ്പോൾ ഋതുരാജ് പതറുന്നത് ടീമിന് തിരിച്ചടിയാണ്. എന്നാൽ ഋതുരാജിന്റെ ക്യാപ്റ്റൻസിയെ അദ്ദേഹം പുകഴ്ത്തി. ടീം മാനേജ്‌മെന്റ് നൽകിയ കൃത്യമായ പദ്ധതികൾ (Blueprint) ഋതുരാജ് ഭംഗിയായി നടപ്പിലാക്കിയതാണ് ഡൽഹിക്കെതിരെയുള്ള വിജയത്തിന് കാരണമെന്ന് അദ്ദേഹം പറഞ്ഞു.
