ഇന്ത്യയുടെ ഇതിഹാസ ഗായിക ആശാ ഭോസ്ലെയുടെ വിയോഗവുമായി ബന്ധപ്പെട്ട വാർത്തകളും ദൃശ്യങ്ങളും സംപ്രേഷണം ചെയ്തതിന് പാകിസ്താനിലെ പ്രമുഖ വാർത്താ ചാനലായ ജിയോ ന്യൂസിന് പാകിസ്താൻ ഇലക്ട്രോണിക് മീഡിയ റെഗുലേറ്ററി അതോറിറ്റി കാരണം കാണിക്കൽ നോട്ടീസ് അയച്ചു.
ഇന്ത്യൻ സിനിമകളിലെ ദൃശ്യങ്ങളും ഗാനങ്ങളും സംപ്രേഷണം ചെയ്തത് പാക് സുപ്രീം കോടതിയുടെ 2018-ലെ ഉത്തരവിന്റെ ലംഘനമാണെന്ന് ചൂണ്ടിക്കാട്ടിയാണ് നടപടി. പാകിസ്താനിലെ ടിവി ചാനലുകളിൽ ഇന്ത്യൻ ഉള്ളടക്കങ്ങൾ പ്രദർശിപ്പിക്കുന്നത് കോടതി നിരോധിച്ചിരുന്നു.
ആശാ ഭോസ്ലെയെപ്പോലെ സാംസ്കാരിക അതിർവരമ്പുകൾക്ക് അതീതയായ ഒരു കലാകാരിയുടെ വിയോഗം റിപ്പോർട്ട് ചെയ്യുമ്പോൾ അവരുടെ സൃഷ്ടികൾ ഉൾപ്പെടുത്തുന്നത് സ്വാഭാവികമാണെന്ന് ചാനൽ മാനേജിംഗ് ഡയറക്ടർ അസ്ഹർ അബ്ബാസ് പറഞ്ഞു. “കലയും വിജ്ഞാനവും മനുഷ്യരാശിയുടെ പൊതുസ്വത്താണ്, അതിനെ അതിർത്തികൾക്കുള്ളിൽ തളച്ചിടരുത്” എന്ന് അദ്ദേഹം എക്സിൽ (X) കുറിച്ചു.
92-ാം വയസ്സിൽ ഏപ്രിൽ 12-നാണ് ആശാ ഭോസ്ലെ അന്തരിച്ചത്. പാകിസ്താനിലെ നിരവധി പ്രമുഖരും കലാകാരന്മാരും അവരുടെ വിയോഗത്തിൽ അനുശോചനം രേഖപ്പെടുത്തിയിരുന്നു. ചാനൽ സിഇഒ മിർ ഇബ്രാഹിം റഹ്മാനോട് ഏപ്രിൽ 27-ന് ഹാജരാകാൻ നിർദ്ദേശിച്ചിട്ടുണ്ട്. 14 ദിവസത്തിനുള്ളിൽ വിശദീകരണം നൽകണമെന്നും അതോറിറ്റി ആവശ്യപ്പെട്ടു.
കലയെ രാഷ്ട്രീയ സംഘർഷങ്ങളിലേക്ക് വലിച്ചിഴയ്ക്കുന്നതിനെതിരെ പാകിസ്താനിലെ മാധ്യമപ്രവർത്തകർക്കിടയിലും സോഷ്യൽ മീഡിയയിലും വലിയ പ്രതിഷേധം ഉയരുന്നുണ്ട്.
