ഐടി ഭീമനായ ടിസിഎസിന്റെ (TCS) നാസിക് ശാഖ കേന്ദ്രീകരിച്ച് നടന്ന മതപരിവർത്തനക്കേസിൽ കൂടുതൽ ഞെട്ടിക്കുന്ന വിവരങ്ങൾ പുറത്ത്. കേസിലെ മുഖ്യപ്രതിയായ തൗസിഫ് അത്താറിന്റെ ഫോണിൽ നിന്ന് ലഭിച്ച രണ്ട് വർഷം പഴക്കമുള്ള ചിത്രമാണ് അന്വേഷണത്തിൽ നിർണ്ണായക വഴിത്തിരിവായത്. ‘ഗോപാൽ’ (പേര് മാറ്റിയിരിക്കുന്നു) എന്ന യുവാവ് ഇസ്ലാം മതം സ്വീകരിച്ച് ‘ഗുൽഷൻ’ ആയി മാറിയതിന്റെ തെളിവുകളാണ് പോലീസിന് ലഭിച്ചിരിക്കുന്നത്.
വെള്ള തൊപ്പി ധരിച്ച യുവാവിനൊപ്പം തൗസിഫ് നിൽക്കുന്ന ചിത്രം കണ്ടപ്പോൾ ആദ്യം മറ്റൊരു പ്രതിയാണെന്നാണ് പോലീസ് കരുതിയത്. എന്നാൽ ചോദ്യം ചെയ്യലിൽ, ഇയാൾ തന്റെ സഹപ്രവർത്തകനാണെന്നും താൻ മുഖേന മതം മാറിയതാണെന്നും തൗസിഫ് വെളിപ്പെടുത്തി. പ്രതിസന്ധി ഘട്ടങ്ങളിലൂടെ കടന്നുപോകുന്ന യുവാക്കളെ ലക്ഷ്യം വെച്ച് കൃത്യമായ ആസൂത്രണത്തോടെയാണ് സംഘം പ്രവർത്തിച്ചിരുന്നതെന്ന് ഇരയുടെ മൊഴി വ്യക്തമാക്കുന്നു.
“2023 മാർച്ചിൽ എന്റെ പിതാവിന് പക്ഷാഘാതം സംഭവിച്ച സമയത്താണ് അവർ എന്നെ സമീപിച്ചത്. കുടുംബ പ്രശ്നങ്ങളാൽ ഞാൻ മാനസികമായി തകർന്നിരിക്കുകയായിരുന്നു,” ഇര പോലീസിനോട് പറഞ്ഞു. ഈ ദുർബലാവസ്ഥ മുതലെടുത്ത സഹപ്രവർത്തകർ, ഹൈന്ദവ ആചാരങ്ങൾ തെറ്റാണെന്നും തങ്ങളുടെ മതത്തിലെ രീതികൾ പിന്തുടർന്നാൽ പിതാവിന്റെ അസുഖം മാറുമെന്നും വിശ്വസിപ്പിച്ചു. നിരന്തരമായി മതപരമായ വീഡിയോകൾ അയച്ചു നൽകിയും ചടങ്ങുകളിൽ പങ്കെടുപ്പിച്ചും യുവാവിന്റെ ചിന്താഗതികളെ മാറ്റിയെടുക്കുകയായിരുന്നു.
കേസിൽ ഇതുവരെ ഏഴ് പേർ അറസ്റ്റിലായിട്ടുണ്ട്. ഇവരിൽ ഭൂരിഭാഗവും ടീം ലീഡർമാരും എഞ്ചിനീയർമാരുമാണ്. പ്രതികൾ മലേഷ്യയിലുള്ള ഒരു മതപ്രഭാഷകനുമായി ബന്ധപ്പെട്ടിരുന്നതായും വാട്സാപ്പ് ഗ്രൂപ്പുകൾ വഴി ഇരകളെ കണ്ടെത്താൻ പ്രത്യേക നിരീക്ഷണം നടത്തിയിരുന്നതായും എസ്ഐടി (SIT) കണ്ടെത്തിയിട്ടുണ്ട്. സ്ത്രീ ജീവനക്കാരെ ലൈംഗികമായി പീഡിപ്പിക്കുകയും മതം മാറാൻ സമ്മർദ്ദം ചെലുത്തുകയും ചെയ്തതായും ഒമ്പതോളം എഫ്ഐആറുകൾ രജിസ്റ്റർ ചെയ്തിട്ടുണ്ട്. കേസ് അതീവ ഗൗരവകരമാണെന്നും നിർബന്ധിത മതപരിവർത്തനത്തെ ഭീകരപ്രവർത്തനമായി കണക്കാക്കണമെന്നും ആവശ്യപ്പെട്ടുള്ള ഹർജി സുപ്രീം കോടതിയുടെ പരിഗണനയിലാണ്. മുതിർന്ന മാനേജർമാരുടെ അറിവോടെയാണോ ഇത്തരം പ്രവർത്തനങ്ങൾ നടന്നതെന്ന കാര്യത്തിൽ അന്വേഷണം ഊർജ്ജിതമാക്കി.
