കശ്മീർ താഴ്വരയെ ഇന്ത്യയുടെ മറ്റ് ഭാഗങ്ങളുമായി ബന്ധിപ്പിക്കുന്ന റെയിൽ ശൃംഖലയിൽ നിർണ്ണായക ചുവടുവെപ്പുമായി വടക്കൻ റെയിൽവേ. ജമ്മുവിൽ നിന്ന് ശ്രീനഗറിലേക്കുള്ള നേരിട്ടുള്ള വന്ദേ ഭാരത് സർവീസ് ഏപ്രിൽ 30-ന് ആരംഭിക്കും. നിലവിൽ കത്രയ്ക്കും ശ്രീനഗറിനും ഇടയിൽ സർവീസ് നടത്തുന്ന രണ്ട് വന്ദേ ഭാരത് ട്രെയിനുകൾ ജമ്മു തവിയിലേക്ക് നീട്ടാനാണ് റെയിൽവേ അധികൃതർ തീരുമാനിച്ചിരിക്കുന്നത്. റെയിൽവേ മന്ത്രി അശ്വിനി വൈഷ്ണവ്, കേന്ദ്രമന്ത്രി ഡോ. ജിതേന്ദ്ര സിംഗ് എന്നിവർ ചേർന്ന് ജമ്മു റെയിൽവേ സ്റ്റേഷനിൽ സർവീസ് ഫ്ലാഗ് ഓഫ് ചെയ്യും. ഇതോടെ ജമ്മുവിൽ നിന്ന് ശ്രീനഗറിലേക്കുള്ള യാത്രാസമയം ഗണ്യമായി കുറയും.
ഏപ്രിൽ 30-ന് സർവീസ് തുടങ്ങുന്നതിനുള്ള എല്ലാ ഒരുക്കങ്ങളും പൂർത്തിയായതായി റെയിൽവേ ഉദ്യോഗസ്ഥർ അറിയിച്ചു. പാളങ്ങളുടെ പരിശോധനയും ട്രയൽ റണ്ണും വിജയകരമായി പൂർത്തിയാക്കി കഴിഞ്ഞു. സുരക്ഷാ ക്രമീകരണങ്ങളും കർശനമാക്കിയിട്ടുണ്ട്. നിലവിൽ 8 കോച്ചുകളുള്ള വന്ദേ ഭാരത് റേക്കുകളാണ് സർവീസ് നടത്തുന്നത്. എന്നാൽ ജമ്മു – ശ്രീനഗർ റൂട്ടിൽ തിരക്ക് കണക്കിലെടുത്ത് അത്യാധുനിക സൗകര്യങ്ങളുള്ള 20 കോച്ചുകളുള്ള റേക്കുകൾ ഉപയോഗിക്കാനാണ് റെയിൽവേ ലക്ഷ്യമിടുന്നത്. ഇതിനായുള്ള പരിഷ്കരിച്ച സമയവിവരം ഉടൻ തന്നെ റെയിൽവേ വകുപ്പ് പ്രസിദ്ധീകരിക്കും. ശ്രീമാതാ വൈഷ്ണോദേവി കത്ര വഴിയായിരിക്കും ഈ ട്രെയിനുകൾ ശ്രീനഗറിലെത്തുക.
ജൂലൈ മൂന്നിന് അമർനാഥ് യാത്ര ആരംഭിക്കാനിരിക്കെ തീർത്ഥാടകർക്ക് വലിയ ആശ്വാസമാണ് ഈ പുതിയ സർവീസ്. രാജ്യത്തിന്റെ വിവിധ ഭാഗങ്ങളിൽ നിന്ന് ജമ്മുവിലെത്തുന്ന ഭക്തർക്ക് ഇനി ട്രെയിൻ മാർഗ്ഗം നേരിട്ട് ശ്രീനഗറിലേക്ക് പോകാം. കടുത്ത മഞ്ഞുവീഴ്ചയോ മണ്ണിടിച്ചിലോ കാരണം ജമ്മു-ശ്രീനഗർ ദേശീയ പാത അടച്ചിടേണ്ടി വരുന്ന സാഹചര്യങ്ങളിൽ വന്ദേ ഭാരത് സർവീസ് യാത്രക്കാർക്ക് വലിയ തുണയാകും. 2025 ജൂൺ 6-നാണ് പ്രധാനമന്ത്രി നരേന്ദ്ര മോദി കത്ര-ശ്രീനഗർ റെയിൽ ലിങ്ക് ഉദ്ഘാടനം ചെയ്തത്. ഇതോടെ താഴ്വരയിലേക്ക് എല്ലാ കാലാവസ്ഥയിലും ഉപയോഗിക്കാവുന്ന റെയിൽ കണക്റ്റിവിറ്റി യാഥാർത്ഥ്യമായിരുന്നു. 2025 ജനുവരിയിൽ സ്ഥാപിതമായ ജമ്മു റെയിൽവേ ഡിവിഷന് കീഴിലാണ് പുതിയ പ്രവർത്തനങ്ങൾ ഏകോപിപ്പിക്കുന്നത്. കശ്മീരിലെ വിനോദസഞ്ചാര മേഖലയ്ക്കും ഈ പുതിയ വന്ദേ ഭാരത് സർവീസ് വലിയ ഉണർവ് നൽകുമെന്നാണ് പ്രതീക്ഷിക്കുന്നത്.
