ഐപിഎല്ലിലെ 33-ാം മത്സരത്തിൽ ഇന്ന് മുംബൈ ഇന്ത്യൻസും ചെന്നൈ സൂപ്പർ കിംഗ്സും നേർക്കുനേർ. സീസണിന് മുന്നോടിയായി ഉണ്ടായ പരിക്കിനെത്തുടർന്ന് ഇത്തവണ ഒരു മത്സരം പോലും കളിക്കാത്ത എം.എസ്. ധോണിയുടെ തിരിച്ചുവരവിനായി കാത്തിരിക്കുകയാണ് ആരാധകർ. മത്സരത്തിന് മുന്നോടിയായി നടന്ന ഒരു ചടങ്ങിൽ ഋതുരാജ് ഗെയ്ക്വാദ് ധോണിയുടെ ആരോഗ്യനിലയെക്കുറിച്ച് സംസാരിച്ചു.
“പരിശീലന മത്സരത്തിനിടെ അദ്ദേഹത്തിന്റെ കാലിന് പരിക്കേൽക്കുകയായിരുന്നു. അതിനുശേഷം അദ്ദേഹത്തിന് ആഗ്രഹിച്ചതുപോലെ ഓടാൻ കഴിഞ്ഞിരുന്നില്ല. ഇപ്പോൾ പതുക്കെ പതുക്കെ അദ്ദേഹം ഫിറ്റ്നസിലേക്ക് തിരിച്ചുവരികയാണ്. അത് അടുത്ത മത്സരത്തിലാകാം, അല്ലെങ്കിൽ അതിന് ശേഷമാകാം. പക്ഷേ അദ്ദേഹം വരും,” ഋതുരാജ് പറഞ്ഞു.
താൻ കളിക്കാത്ത സമയത്ത് ടീമിലെ യുവതാരങ്ങളുടെ പ്രകടനം കണ്ട് ധോണി സംതൃപ്തനാണെന്നും അവർക്ക് അവസരം നൽകുന്നതിലാണ് അദ്ദേഹം സന്തോഷം കണ്ടെത്തുന്നതെന്നും ഗെയ്ക്വാദ് കൂട്ടിചേർത്തു. ധോണി കളിച്ചാൽ തന്നെ അദ്ദേഹം മുൻനിരയിൽ ബാറ്റ് ചെയ്യാൻ സാധ്യതയില്ലെന്ന് നായകൻ വ്യക്തമാക്കി.
കഴിഞ്ഞ രണ്ട് വർഷമായി ധോണി പിന്തുടരുന്ന അതേ രീതി തന്നെയാകും ഇത്തവണയും. യുവതാരങ്ങൾക്ക് കൂടുതൽ അവസരം നൽകാൻ അദ്ദേഹം ആഗ്രഹിക്കുന്നു. “അനിവാര്യമായ സാഹചര്യമുണ്ടെങ്കിൽ മാത്രമേ അദ്ദേഹം നേരത്തെ ഇറങ്ങൂ. അവസാന മൂന്നോ നാലോ ഓവറുകളിൽ വന്ന് പരമാവധി നാശനഷ്ടങ്ങൾ വരുത്താനാണ് അദ്ദേഹം ഇഷ്ടപ്പെടുന്നത്,” ഋതുരാജ് വ്യക്തമാക്കി.
Rutu shares the latest on MSD! 🎙️💛 #WhistlePodu #Yellove @FedEx pic.twitter.com/qCcGVvLQmu
— Chennai Super Kings (@ChennaiIPL) April 22, 2026
