മലയാള സിനിമയിൽ സമീപകാലത്ത് ഒരുപാട് ചിത്രങ്ങൾ ഇറങ്ങിയെങ്കിലും സോഷ്യൽ മീഡിയയിൽ പുണ്യം അഹം’ എന്ന പോലെ ട്രോളുകൾ ഏറ്റുവാങ്ങിയ ഒരു സിനിമയില്ല. ഇതിന്റെ ഇതിവൃത്തവും അവതരണവുമാണ് ഇപ്പോൾ ട്രോളന്മാരുടെ പ്രധാന ആയുധം. 2010-ൽ രാജ് നായർ സംവിധാനം ചെയ്ത, പൃഥ്വിരാജ് സുകുമാരൻ നായകനായ ‘പുണ്യം അഹം’ ഇപ്പോൾ ചിത്രമിറങ്ങി 16 വർഷങ്ങൾക്ക് ശേഷം എങ്ങനെ വീണ്ടും ട്രെൻഡായി എന്നതിന് ഉത്തരമില്ല.
വരാരുചിയുടെയും വായില്ലാക്കുന്നിലപ്പന്റെയും ഐതിഹ്യങ്ങളെ ആധുനിക കാലഘട്ടത്തിലേക്ക് പറിച്ചുനട്ടുകൊണ്ട് രാജ് നായർ സംവിധാനം ചെയ്ത ചിത്രത്തിൽ പൃഥ്വിരാജ്, സംവൃത സുനിൽ, നെടുമുടി വേണു എന്നിവർ പ്രധാന വേഷങ്ങളിൽ അഭിനയിച്ചു. മലബാറിന്റെ പശ്ചാത്തലത്തിലാണ് കഥ പറയുന്നത്. ബ്രാഹ്മണനായ പിതാവിനും താഴ്ന്ന ജാതിയിലുള്ള അമ്മയ്ക്കും ജനിച്ച നാരായണ ഉണ്ണി എന്ന യുവാവിനെ കേന്ദ്രീകരിച്ചാണ് കഥ നീങ്ങുന്നത്. മാതാപിതാക്കൾ വേർപിരിഞ്ഞതോടെ അമ്മയുടെ സംരക്ഷണയിൽ വളരുന്ന ഉണ്ണി, തന്റെ സ്വത്വം തേടിയുള്ള യാത്രയിലാണ്.
ജീവിതത്തിൽ അറിഞ്ഞോ അറിയാതെയോ തന്റെ പിതാവ് ചെയ്ത അതേ തെറ്റുകൾ ഉണ്ണിയും ആവർത്തിക്കുന്നതാണ് ചിത്രത്തിന്റെ കാതൽ. വരാരുചിയും മകൻ പാക്കനാരുമടങ്ങുന്ന ‘പറയിപെറ്റ പന്തിരുകുലം’ എന്ന നാടോടിക്കഥയുടെയും ഭാരതീയ തത്ത്വചിന്തകളുടെയും സ്വാധീനം സിനിമയിൽ ഉടനീളമുണ്ട്. ജാതിവ്യവസ്ഥയും പാരമ്പര്യങ്ങളും ഒരു മനുഷ്യന്റെ ജീവിതത്തെ എങ്ങനെയൊക്കെ ബാധിക്കുന്നു എന്ന് വളരെ ഗൗരവകരമായി തന്നെ ചിത്രം അവതരിപ്പിക്കാൻ ശ്രമിക്കുന്നുണ്ട്.
ചിത്രം ഇറങ്ങിയ കാലത്ത് ശ്രദ്ധിക്കപ്പെട്ടില്ല എങ്കിലും അടുത്ത കാലത്തായി ഇതിലെ സംഭാഷണങ്ങളിലെ പക്വതയില്ലായ്മയും അതിഭാവുകത്വവും തീമുംപറഞ്ഞ് സോഷ്യൽ മീഡിയയിൽ ചില ട്രോളുകൾ വരുന്നുണ്ട്. ഗൗരവകരമായ ഒരു വിഷയം കൈകാര്യം ചെയ്യുന്ന സിനിമയാണെങ്കിലും അവതരണ ശൈലിയിലെ ചില പോരായ്മകളാണ് ട്രോളന്മാരെ ആകർഷിക്കുന്നത്.
