ഐപിഎല്ലിൽ രാജസ്ഥാൻ റോയൽസിനായി റെക്കോർഡുകൾ തകർത്ത് മുന്നേറുന്ന 15 വയസ്സുകാരൻ വൈഭവ് സൂര്യവംശി ഇപ്പോൾ സോഷ്യൽ മീഡിയയിൽ തരംഗമാകുന്നത് ബാറ്റിംഗ് കൊണ്ടല്ല, മറിച്ച് ആരാധകരുമായി നടത്തിയ ഒരു രസകരമായ പ്രാങ്ക് വീഡിയോയിലൂടെയാണ്. രാജസ്ഥാൻ റോയൽസ് തങ്ങളുടെ എക്സ് ഹാൻഡിലിലൂടെ പങ്കുവെച്ച വീഡിയോയിലാണ് വൈഭവിന്റെ കുസൃതി ഒളിഞ്ഞിരിക്കുന്നത്.
വിമാനത്താവളത്തിൽ വെച്ച് ഫോട്ടോ എടുക്കാൻ സമീപിച്ച ഒരു കൂട്ടം കുട്ടികളോട് താൻ ഫോട്ടോ എടുക്കാൻ പണം വാങ്ങാറുണ്ടെന്ന് വൈഭവ് തമാശയായി പറഞ്ഞു. “ഫോട്ടോ എടുക്കാൻ ഞാൻ കാശ് വാങ്ങും, സത്യമാണ് പറയുന്നത്” എന്നായിരുന്നു താരത്തിന്റെ മറുപടി. 100 രൂപ തന്നാൽ ഫോട്ടോ തരാമെന്ന് പറഞ്ഞപ്പോൾ കുട്ടികൾ അമ്പരന്നു. എന്നാൽ അതിലൊരു കുട്ടി പെട്ടെന്ന് 200 രൂപ വാഗ്ദാനം ചെയ്തതോടെ വൈഭവ് താൻ വെറുതെ തമാശ പറഞ്ഞതാണെന്ന് വെളിപ്പെടുത്തുകയും ആരാധകർക്കൊപ്പം ഫോട്ടോയ്ക്ക് പോസ് ചെയ്യുകയും ചെയ്തു.
സൺറൈസേഴ്സ് ഹൈദരാബാദിനെതിരായ മത്സരത്തിൽ 57 പന്തിൽ വൈഭവ് സൂര്യവംശി തകർപ്പൻ സെഞ്ച്വറി നേടിയിരുന്നു. താരത്തിന്റെ കരുത്തിൽ രാജസ്ഥാൻ 228 റൺസ് നേടിയെങ്കിലും മത്സരം 5 വിക്കറ്റിന് പരാജയപ്പെടുകയായിരുന്നു. കഴിഞ്ഞ വർഷത്തെ അരങ്ങേറ്റത്തിന് ശേഷം ഇത്തവണയും സ്ഫോടനാത്മകമായ ബാറ്റിംഗാണ് സൂര്യവംശി കാഴ്ചവെക്കുന്നത്. എട്ട് മത്സരങ്ങളിൽ നിന്ന് 357 റൺസുമായി താരം റൺവേട്ടയിൽ രണ്ടാം സ്ഥാനത്തുണ്ട്.
നാളെ പഞ്ചാബ് കിംഗ്സിനെതിരെയാണ് രാജസ്ഥാന്റെ അടുത്ത മത്സരം. ക്യാപ്റ്റൻ റിയാൻ പരാഗ് ഫോം കണ്ടെത്താൻ ബുദ്ധിമുട്ടുന്നത് രാജസ്ഥാന് വലിയ തലവേദനയാണ്. ആദ്യ നാല് മത്സരങ്ങൾ ജയിച്ച ടീമിന് ടൂർണമെന്റിന്റെ മധ്യഘട്ടത്തിൽ താളം നഷ്ടപ്പെട്ട അവസ്ഥയാണുള്ളത്. ശ്രേയസ് അയ്യർ – റിക്കി പോണ്ടിംഗ് സഖ്യത്തിന് കീഴിൽ പഞ്ചാബ് കിംഗ്സ് അതിശക്തമായ തിരിച്ചുവരവാണ് ഇത്തവണ നടത്തിയിരിക്കുന്നത്.
Baccha party always a step ahead 😂 pic.twitter.com/locrozR0Yh
— Rajasthan Royals (@rajasthanroyals) April 27, 2026
