ഡിജിറ്റൽ ഇന്ത്യയുടെ കരുത്ത് കൂട്ടി ആധാർ കാർഡുകൾ ഇനി ഗൂഗിൾ വാലറ്റിലും ലഭ്യമാകും. യുഐഡിഎഐയുമായി (UIDAI) ചേർന്നാണ് ഗൂഗിൾ ഈ പുത്തൻ സൗകര്യം ഇന്ത്യൻ ഉപഭോക്താക്കൾക്കായി അവതരിപ്പിക്കുന്നത്. ഇനിമുതൽ തിരിച്ചറിയൽ രേഖയായി ആധാർ കാർഡിന്റെ ഒറിജിനലോ ഫോട്ടോസ്റ്റാറ്റോ കയ്യിൽ കരുതുന്നതിന് പകരം സ്മാർട്ട്ഫോണിലെ ഗൂഗിൾ വാലറ്റ് ആപ്പ് ഉപയോഗിച്ച് വെരിഫിക്കേഷൻ പൂർത്തിയാക്കാം. ആധാർ-പാൻ ലിങ്കിംഗ് പോലെ ഒന്നല്ല ഇതെന്നും, പകരം സുരക്ഷിതമായി ആധാർ വിവരങ്ങൾ ഫോണിൽ സൂക്ഷിക്കാനുള്ള സൗകര്യമാണ് ഇതെന്നും ഗൂഗിൾ വ്യക്തമാക്കി.
ആധാർ വെരിഫിക്കേഷൻ ലളിതമാക്കുന്ന ‘ആധാർ വെരിഫയബിൾ ക്രെഡൻഷ്യൽസ്’ എന്ന ഓഫ്ലൈൻ വെരിഫിക്കേഷൻ പ്രോട്ടോക്കോൾ വഴിയാണ് ഈ സേവനം ലഭ്യമാകുക. നിലവിൽ പിവിആർ സിനിമാസ് (PVR INOX), ഭാരത് മാട്രിമോണി തുടങ്ങിയ പ്രമുഖ പ്ലാറ്റ്ഫോമുകൾ ഗൂഗിൾ വാലറ്റ് വഴിയുള്ള ആധാർ വെരിഫിക്കേഷൻ അംഗീകരിച്ചു തുടങ്ങിയിട്ടുണ്ട്. താമസിയാതെ മൈഗേറ്റ് (MyGate), സ്നാബിറ്റ് (Snabbit) തുടങ്ങിയവരും ഈ സേവനത്തിലേക്ക് എത്തും. വിമാനത്താവളങ്ങളിലും മറ്റ് സർക്കാർ ഇതര സ്ഥാപനങ്ങളിലും പ്രായം തെളിയിക്കാനോ അഡ്രസ് വെരിഫിക്കേഷൻ നടത്താനോ ഇത് എളുപ്പമാകും.
സ്വകാര്യതയ്ക്ക് വലിയ പ്രാധാന്യം നൽകിക്കൊണ്ടാണ് ഗൂഗിൾ ഈ സംവിധാനം ഒരുക്കിയിരിക്കുന്നത്. ‘സെലക്ടീവ് ഡിസ്ക്ലോഷർ’ (Selective Disclosure) എന്ന ഫീച്ചർ വഴി ആവശ്യമുള്ള വിവരങ്ങൾ മാത്രം കൈമാറാൻ ഉപഭോക്താവിന് സാധിക്കും. ഉദാഹരണത്തിന്, ഒരാൾക്ക് തന്റെ പ്രായം മാത്രമാണ് വെരിഫൈ ചെയ്യേണ്ടതെങ്കിൽ ആധാർ നമ്പറോ അഡ്രസ്സോ വെളിപ്പെടുത്താതെ തന്നെ അത് പൂർത്തിയാക്കാം. വിവരങ്ങൾ ഫോണിൽ തന്നെ സുരക്ഷിതമായി എൻക്രിപ്റ്റ് ചെയ്താണ് സൂക്ഷിക്കുന്നത്. ആഗോള ഡിജിറ്റൽ ഐഡി മാനദണ്ഡങ്ങൾ പാലിച്ചാണ് ഈ സിസ്റ്റം നിർമ്മിച്ചിരിക്കുന്നതെന്ന് ഗൂഗിൾ വാലറ്റ് ഗ്രൂപ്പ് പ്രൊഡക്റ്റ് മാനേജർ അലൻ സ്റ്റാപെൽബെർഗ് പറഞ്ഞു. വരും ദിവസങ്ങളിൽ കൂടുതൽ ആപ്പുകളും സ്ഥാപനങ്ങളും ഈ സേവനത്തിന്റെ ഭാഗമാകുന്നതോടെ ഫിസിക്കൽ കാർഡുകളുടെ ഉപയോഗം വലിയ തോതിൽ കുറയ്ക്കാൻ സാധിക്കുമെന്നാണ് വിലയിരുത്തൽ. ഗൂഗിൾ വാലറ്റ് ഉള്ള എല്ലാ ആൻഡ്രോയിഡ് ഫോണുകളിലും ഈ സൗകര്യം ലഭ്യമായിത്തുടങ്ങും.
