മലപ്പുറം : കേരളത്തിൽ യുഡിഎഫ് അധികാരത്തിൽ വന്നാൽ മുസ്ലിം ലീഗ് ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി അടുത്ത മുഖ്യമന്ത്രിയാകണമെന്ന ആവശ്യവുമായി സുന്നി മഹല്ല് ഫെഡറേഷൻ . മലപ്പുറം ചെമ്മാട് ദാറുൽ ഹുദയിൽ നടന്ന എസ്.എം.എഫ് ഗോൾഡൻ ജൂബിലി പ്രഖ്യാപന വേദിയിലായിരുന്നു ഈ ആവശ്യം ഉന്നയിച്ചത്. മെയ് നാലിന് കുഞ്ഞാലിക്കുട്ടി മുഖ്യമന്ത്രിയാകുമെന്ന്
എസ്.എം.എഫ് നേതാവ് അസ്ലം മഷ്ഹൂർ തങ്ങൾ പ്രഖ്യാപിച്ചു.
കുഞ്ഞാലിക്കുട്ടിയെ വേദിയിൽ ഇരുത്തി കൊണ്ടായിരുന്നു അസ്ലം മഷ്ഹൂർ തങ്ങൾ ഈ പ്രഖ്യാപനം നടത്തിയത്.
മുസ്ലിം ലീഗ് പ്രസിഡന്റ് പാണക്കാട് സ്വാദിഖലി തങ്ങള് അടക്കം മുതിര്ന്ന മുസ്ലിം ലീഗ് നേതാക്കളും ഈ സമയം വേദിയിലുണ്ടായിരുന്നു. ഇകെ വിഭാഗം സമസ്തയുമായി അടുത്ത ബന്ധമുള്ള സംഘടനയാണ് എസ്.എം.എഫ്. മുസ്ലിം ലീഗിന്റെ വോട്ട് ബാങ്കിൽ നിർണ്ണായക സ്വാധീനമുള്ള ഇത്തരം സംഘടനകളിൽ നിന്ന് ഉയരുന്ന ഈ ആവശ്യം യുഡിഎഫിനുള്ളിൽ പുതിയ ചർച്ചകൾക്ക് വഴിതുറക്കുമെന്നാണ് കരുതപ്പെടുന്നത്.
