ന്യൂഡൽഹി : കേന്ദ്ര ആഭ്യന്തര മന്ത്രി അമിത് ഷാ, മുൻ പ്രധാനമന്ത്രി മൻമോഹൻ സിംഗ്, ഭാര്യ ഗുർശരൺ കൗർ , സോണിയ ഗാന്ധി തുടങ്ങിയവർക്ക് സുരക്ഷ ഒരുക്കാൻ സിആർപിഎഫ് വനിതാ കമാൻഡോകൾ .
‘ഇസഡ്’ പ്ലസ് കാറ്റഗറിയുള്ള വിഐപികളുടെ സുരക്ഷസംഘത്തിലാണ് സിആർപിഎഫ് വനിതാ കമാൻഡോകളുടെ ഒരു സംഘത്തെ വിന്യസിക്കാൻ തയ്യാറെടുക്കുന്നത് . വിഐപി സുരക്ഷയിൽ പരിശീലനം പൂർത്തിയാക്കിയ 32 വനിതാ പോരാളികൾ അടങ്ങുന്ന ആദ്യ ബാച്ചാണിത്.ഇതാദ്യമായാണ് സിപിആർഎഫ് വിഐപി സുരക്ഷയ്ക്കായി വനിതാ കമാൻഡോകളെ വിന്യസിക്കുന്നതെന്നാണ് റിപ്പോർട്ട്.
അവർ അടുത്തിടെ , പ്രത്യേക ആയുധപരിശീലനം, ബോഡി ഫ്രിസ്ക്കിംഗ് തുടങ്ങിയവയിൽ 10 ആഴ്ചത്തെ പരിശീലനത്തിന് വിധേയരായിരുന്നു . സെപ്റ്റംബറിൽ ആഭ്യന്തര മന്ത്രാലയം വിവിപി സുരക്ഷയ്ക്കായി വനിതാ സുരക്ഷാ ഉദ്യോഗസ്ഥരെ വിന്യസിക്കാൻ അനുമതി നൽകിയിരുന്നു. പരിശീലനം ലഭിച്ച ഈ 32 കമാൻഡോകളെ നോമിനേഷൻ അടിസ്ഥാനമാക്കിയാണ് തിരഞ്ഞെടുത്തത്. ആദ്യ ബാച്ചിലേക്ക്, സിആർപിഎഫിന് 54 നോമിനേഷനുകൾ ലഭിച്ചിരുന്നു, അതിൽ 32 പേരെ തിരഞ്ഞെടുത്തു. കോൺസ്റ്റബിൾ മുതൽ സബ് ഇൻസ്പെക്ടർ വരെയുള്ളവരാണ് ഇവർ.
ജനുവരി 15 മുതൽ സുരക്ഷയ്ക്കായി ഇവരെ വിന്യസിക്കാനാണ് സാധ്യത. ഈ കമാൻഡോകളെ ആദ്യം ഹൗസ് പ്രൊട്ടക്ഷൻ ടീമിന്റെ ഭാഗമായി അമിത്ഷാ അടക്കമുള്ളവരുടെ വസതിയിൽ വിന്യസിക്കും. അവർ സ്ത്രീ സന്ദർശകരെ പരിശോധിക്കും . ആയുധങ്ങളും ഇവർക്ക് നൽകും . അഞ്ച് മുതൽ ആറ് വരെ കമാൻഡോകളെയാകും ഒരാൾക്ക് സുരക്ഷയ്ക്കായി നൽകുക .
Discussion about this post