ഐപിഎൽ 2026-ൽ ആരാധകർ ആകാംക്ഷയോടെ കാത്തിരിക്കുന്ന വാർത്ത പുറത്ത് വരുന്നു. ചെന്നൈ സൂപ്പർ കിംഗ്സ് ഇതിഹാസ താരം എം.എസ്. ധോണി ലക്നൗ സൂപ്പർ ജയന്റ്സിനെതിരായ അടുത്ത മത്സരത്തിനായി ടീമിനൊപ്പം യാത്ര തിരിക്കുമെന്ന് റിപ്പോർട്ടുകൾ.
മെയ് 15 വെള്ളിയാഴ്ച ഏക്ന സ്റ്റേഡിയത്തിലാണ് സിഎസ്കെ – ലക്നൗ പോരാട്ടം നടക്കുന്നത്. സീസണിന്റെ തുടക്കത്തിൽ ടീമിനൊപ്പം ഇല്ലാതിരുന്ന ധോണി, പിന്നീട് മുംബൈ ഇന്ത്യൻസ്, ഹൈദരാബാദ് എന്നിവർക്കെതിരായ എവേ മത്സരങ്ങളിൽ ടീമിനൊപ്പം സഞ്ചരിച്ചിരുന്നു. എന്നാൽ പരിക്ക് വീണ്ടും വഷളായതിനെ തുടർന്ന് ഡൽഹിയിൽ നടന്ന കഴിഞ്ഞ മത്സരത്തിൽ അദ്ദേഹം ടീമിനൊപ്പം ഉണ്ടായിരുന്നില്ല. ഇപ്പോൾ റെവ്സ്പോർട്സ് പുറത്തുവിട്ട റിപ്പോർട്ടുകൾ പ്രകാരം ധോണി നാളെ ലക്നൗവിലേക്ക് തിരിക്കുന്ന സംഘത്തോടൊപ്പം ചേരും.
കളിക്കാൻ സാധിക്കില്ലെങ്കിലും ടീമിനൊപ്പം പരിശീലന സെഷനുകളിൽ ധോണി സജീവമാണ്. ചേപ്പോക്കിൽ നടന്ന നെറ്റ് പ്രാക്ടീസിനിടെ താരം പന്തെറിയുന്നതും സഹതാരങ്ങൾക്കും കോച്ചിംഗ് സ്റ്റാഫിനും നിർദ്ദേശങ്ങൾ നൽകുന്നതും ആരാധകർക്ക് ആവേശം പകരുന്ന കാഴ്ചയായിരുന്നു.
പ്ലേ ഓഫ് റേസിൽ നിലനിൽക്കാൻ ഗെയ്ക്വാദിനും സംഘത്തിനും ഈ മത്സരം അതീവ നിർണ്ണായകമാണ്. പ്ലേ ഓഫ് റേസിൽ നിന്ന് പുറത്തായിക്കഴിഞ്ഞ ലക്നൗവിനെ പരാജയപ്പെടുത്താൻ സാധിച്ചാൽ ചെന്നൈയ്ക്ക് ആദ്യ നാല് സ്ഥാനങ്ങളിൽ എത്താൻ വലിയ സാധ്യതയുണ്ട്. മെയ് 18-ന് സൺറൈസേഴ്സ് ഹൈദരാബാദിനെതിരെയാണ് ചെന്നൈയുടെ അവസാന ഹോം മത്സരം.
