അമേരിക്കയും ഇറാനും തമ്മിലുള്ള സംഘർഷത്തിൽ മധ്യസ്ഥത വഹിക്കാനുള്ള പാകിസ്ഥാൻ്റെ വിശ്വാസ്യതയെ ചോദ്യം ചെയ്ത് മുതിർന്ന റിപ്പബ്ലിക്കൻ സെനറ്റർ ലിൻഡ്സെ ഗ്രഹാം രംഗത്തെത്തി. ഇറാനിയൻ സൈനിക വിമാനങ്ങൾക്ക് പാകിസ്ഥാൻ തങ്ങളുടെ വ്യോമതാവളങ്ങളിൽ സംരക്ഷണമൊരുക്കുന്നു എന്ന റിപ്പോർട്ടുകൾക്ക് പിന്നാലെയാണ് ഈ വിമർശനം.
അമേരിക്കൻ ആക്രമണങ്ങളിൽ നിന്ന് രക്ഷപ്പെടാൻ ഇറാൻ തങ്ങളുടെ സൈനിക വിമാനങ്ങൾ പാകിസ്ഥാനിലെ വ്യോമതാവളങ്ങളിൽ ഒളിപ്പിച്ചിരിക്കുകയാണെന്ന സിബിഎസ് ന്യൂസ് റിപ്പോർട്ട് പുറത്തുവന്നതോടെയാണ് പുതിയ വിവാദങ്ങൾ ഉടലെടുത്തത്. ഇതോടെ മധ്യസ്ഥനെന്ന നിലയിലുള്ള പാകിസ്ഥാൻ്റെ പങ്കിനെതിരെ യുഎസ് സെനറ്റ് ഫോറിൻ റിലേഷൻസ് കമ്മിറ്റിയിലെ മുതിർന്ന അംഗമായ ലിൻഡ്സെ ഗ്രഹാം കടുത്ത വിയോജിപ്പ് പ്രകടിപ്പിച്ചു
താൻ പാകിസ്ഥാനെ ഒട്ടും വിശ്വസിക്കുന്നില്ലെന്ന് സെനറ്റർ ഗ്രഹാം തുറന്നടിച്ചു. ഇറാനിയൻ സൈനിക വിമാനങ്ങൾക്ക് പാകിസ്ഥാൻ താവളമൊരുക്കുന്നുണ്ടെങ്കിൽ, മധ്യസ്ഥത വഹിക്കാൻ മറ്റൊരു രാജ്യം നോക്കുന്നതാകും ഉചിതമെന്നും അദ്ദേഹം പറഞ്ഞു. അമേരിക്കയും ഇറാനും തമ്മിലുള്ള ചർച്ചകൾ എങ്ങുമെത്താത്തതിൽ അത്ഭുതമില്ലെന്നും അദ്ദേഹം കൂട്ടിച്ചേർത്തു.
ഏപ്രിൽ ആദ്യം പ്രസിഡൻ്റ് ട്രംപ് ഇറാനുമായി വെടിനിർത്തൽ പ്രഖ്യാപിച്ചതിന് പിന്നാലെ, നിരവധി ഇറാനിയൻ സൈനിക വിമാനങ്ങൾ റാവൽപിണ്ടിയിലെ നൂർ ഖാൻ വ്യോമസേനാ താവളത്തിലേക്ക് അയച്ചതായി യുഎസ് ഉദ്യോഗസ്ഥർ വെളിപ്പെടുത്തുന്നു. അമേരിക്കയുടെയോ ഇസ്രായേലിൻ്റെയോ ആക്രമണങ്ങളിൽ നിന്ന് തങ്ങളുടെ ആസ്തികളെ സംരക്ഷിക്കാനുള്ള ഇറാന്റെ ശ്രമമായാണ് ഇതിനെ വിലയിരുത്തുന്നത്.
ഇറാനിയൻ വിമാനങ്ങൾ രാജ്യത്തുണ്ടെന്ന് പാകിസ്ഥാൻ ഉദ്യോഗസ്ഥർ സമ്മതിച്ചെങ്കിലും സിബിഎസ് ന്യൂസിൻ്റെ റിപ്പോർട്ട് തെറ്റിദ്ധരിപ്പിക്കുന്നതാണെന്ന് അവർ പറഞ്ഞു. ചർച്ചകളുമായി ബന്ധപ്പെട്ട നയതന്ത്ര ആവശ്യങ്ങൾക്കായാണ് വിമാനങ്ങൾ എത്തിയതെന്നും സൈനിക നീക്കങ്ങളുമായി ഇതിന് ബന്ധമില്ലെന്നുമാണ് പാകിസ്ഥാൻ വിദേശകാര്യ മന്ത്രാലയത്തിൻ്റെ വാദം.
